O‘zbekiston 12 yillik ta’lim tizimiga o‘tadi

Xabaringiz bor, kecha, 8-sentyabr kuni prezident Shavkat Mirziyoyev ta’lim tizimini isloh qilish masalalariga oid taqdimot bilan tanishdi.

Taqdimot bilan Prezident Administratsiyasi rahbarining ta’lim islohoti bo‘yicha o‘rinbosari Hilola Umarova tanishtirdi. Unda “bog‘cha — maktab — oliygoh”  tizimini qamrab olishga mo‘ljallangan bir qancha yangi g‘oyalar ilgari surildi.

Jumladan, taqdimotda 12 yillik ta’limga o‘tish bo‘yicha topshiriq berildi. 

Bunda aynan maktablar 12 yillik ta’limga o‘tmaydi, balki bog‘chalardagi maktabga tayyorlov guruhlari tizimi ham maktab ta’limiga qo‘shib yuborish hisobiga 12 yillik ta’lim tizimiga o‘tiladi.

Bu tizimga o‘tishning afzallik jihatlari haqida Maktabgacha va maktab ta’limi vaziri o‘rinbosari Sardor Radjabov O‘zbekiston 24 telekanaliga bergan intervyusida batafsil aytib berdi.

“Maktabga tayyorlov guruhlari hozirgi kunda mana 100 foizga yaqin qamrov amalga oshirilyapti. Demak, mana shu tizimni ham maktab ta’limiga qo‘shib turib 12 yillik ta’limga o‘tish bo‘yicha topshiriq berildi. 

Bu yerda bizga asosiy foydasi nima bo‘ladi? 

Birinchisi ta’lim sifati bo‘ladigan bo‘lsa, ikkinchisi, bu xorijiy oliy ta’lim muassasalariga o‘qishga kirayotganda bizning o‘quvchilar tomonidan bir yil foundation kursi, ya’ni o‘sha boshlang‘ich tayyorgarlik bo‘yicha o‘qishga majbur bo‘lishyapti va bu bizning farzandlarimiz bir yil yo‘qotishiga olib kelyapti. 

Agarda biz 12 yillik ta’limni qonunchilikka kiritadigan bo‘lsak, bunda bizda bir qator davlatlarda, ya’ni foundation o‘qishga majbur bo‘lishmaydi va to‘g‘ridan-to‘g‘ri o‘sha bakalavr darajasiga kirganda o‘qish imkoniyati yaratiladi, - dedi Sardor Radjabov.