Navro‘z va Ramazon hayiti arafasida o‘quvchilar 10 kun, o‘qituvchilar esa 3 kun dam oladi

Xabaringiz bor, Ramazon hayiti 20-mart sanasida nishonlanishi munosabati bilan o‘quvchilarning bahorgi ta’tili 20-martdan boshlanib, 28-martga qadar davom etishi belgilandi.

Bunda o‘quv yilining 4-choragi 30-mart (dushanba) kunidan boshlanib, joriy o‘quv yilining 20-mart (juma) kunidagi va 28-mart (shanba) kunidagi o‘quv mashg‘ulotlari 4-chorakda o‘quv dasturlariga tig‘izlashtirilgan holda o‘qitiladi. Ya’ni, maktab o‘quvchilari bahorgi ta’tilda to‘liq 10 kun dam oladi.

Pedagog xodimlar 3 kun dam oladi

O‘zbekiston Respublikasi Prezidenti “Muborak Ramazon hayitini nishonlash to‘g‘risida”gi qarori bilan 2026-yil 20-mart kuni Ramazon hayiti bayrami sifatida keng nishonlanishi belgilandi.

Shu munosabat bilan dam olish kunlari quyidagicha belgilandi

• 20-mart, juma – Ramazon hayiti, barcha uchun dam olish kuni;

• 21-mart, shanba – Navro‘z bayrami, barcha uchun dam olish kuni;

• 22-mart, yakshanba – odatiy dam olish kuni.

Bunda 23-mart, dushanba - haftada 5 kun ishlaydiganlar (hududiy MMTB xodimlari) uchungina dam olish kuni hisoblanadi. Davlat ta’lim tashkiloti xodimlari 6 kunlik ish haftasida ishlagani bois, ular uchun 23-mart rasman ish kuni hisoblanadi.

Amaldagi qonunchilikka ko‘ra maktabda darslar bo‘lmagan vaqtlarda o‘qituvchilar pedagogik yuklamasida belgilab berilgan ishlarni amalga oshiradi yoki maktab ma’muriyati tomonidan berilgan topshiriqlarni bajaradi.