Endi bog‘chalardagi o‘rta maxsus ma’lumotli pedagoglar 5+1 dasturi asosida oliygohda o‘qishi mumkin

Vazirlar Mahkamasining 24.06.2026 yildagi “Maktabgacha ta’lim yo‘nalishi bo‘yicha xalqaro tajriba asosida bakalavrlar tayyorlash tizimini joriy etish to‘g‘risida”gi 321-son qarori qabul qilindi. 

Qarorga muvofiq, 2026/2027 o‘quv yilidan boshlab maktabgacha ta’lim muassasalarida faoliyat yuritayotgan o‘rta maxsus ma’lumotli pedagog kadrlar uchun quyidagi tartib joriy etiladi:

• haftada 1 kun pedagogika oliy ta’lim tashkilotida;

• 5 kun maktabgacha ta’lim tashkilotida to‘lov-shartnoma asosida mazkur yo‘nalishda bakalavriat bosqichida dual ta’lim shaklida o‘qish.

Bunda davlat va (yoki) nodavlat maktabgacha ta’lim muassasalarida kamida uch yil davomida faoliyat yuritayotgan o‘rta maxsus ma’lumotli pedagog kadrlar OTM bakalavriatiga o‘tkazilayotgan test sinovlari asosida qabul qilinadi.

Dual ta’lim shaklida maktabgacha ta’lim bakalavriat ta’lim yo‘nalishida pedagogika oliy ta’lim tashkilotlariga faqat tegishli hududdagi bog‘chalarida faoliyat yuritayotgan pedagoglar qabul qilinadi.

Qarorga muvofiq, dual ta’lim shaklida maktabgacha ta’lim bakalavriat yo‘nalishida kadrlar tayyorlash yo‘lga qo‘yiladigan 15 ta pedagogika oliy ta’lim muassasasi belgilangan. 

Bu muassasalar O‘zbekistonning barcha viloyatlari va Qoraqalpog‘iston Respublikasini qamrab oladi

• O‘zbekiston Milliy pedagogika universiteti (Toshkent shahri)

• Nukus davlat pedagogika instituti (Qoraqalpog‘iston Respublikasi)

• Andijon davlat pedagogika instituti (Andijon viloyati)

• Buxoro davlat pedagogika instituti (Buxoro viloyati)

• Jizzax davlat pedagogika universiteti (Jizzax viloyati)

• Shahrisabz davlat pedagogika instituti (Qashqadaryo viloyati)

• Namangan davlat pedagogika instituti (Namangan viloyati)

• Navoiy davlat universiteti (Navoiy viloyati)

• Samarqand davlat pedagogika instituti (Samarqand viloyati)

• Kattaqo‘rg‘on davlat pedagogika instituti (Samarqand viloyati)

• Guliston davlat pedagogika instituti (Sirdaryo viloyati)

• Termiz davlat pedagogika instituti (Surxondaryo viloyati)

• Chirchiq davlat pedagogika universiteti (Toshkent viloyati)

• Urganch davlat pedagogika instituti (Xorazm viloyati)

• Qo‘qon davlat universiteti (Farg‘ona viloyati).

Shuningdek, qaror bilan pedagog kadrlar tayyorlaydigan davlat va nodavlat oliy ta’lim tashkilotlarida tahsil olayotgan bakalavrlarning bilimlari har yili tasdiqlangan reja-jadval asosida tashqi diagnostika orqali baholab boriladi.

2028/2029-o‘quv yilidan O‘zbekiston milliy pedagogika universiteti, 2029/2030-o‘quv yilidan esa Maktabgacha va maktab ta’limi vazirligi tizimidagi pedagogika OTMlarida xalqaro dasturlar bo‘yicha tahsil olayotgan bitiruvchi kurs talabalari yakuniy davlat attestatsiyasi bilan birga kasbiy sertifikatlash sinovlarida bepul ishtirok etish imkoniyatiga ega bo‘ladi.