Inklyuziv ta’lim o‘qituvchilarini sertifikatlash tizimi yo‘lga qo‘yiladi

“O‘zbekiston – 2030” strategiyasini “Atrof-muhitni asrash va “yashil iqtisodiyot” yilida amalga oshirish bo‘yicha davlat dasturi va uni tasdiqlash to‘g‘risidagi O‘zbekiston Respublikasi Prezidenti Farmoni loyihasi ishlab chiqilib, Adliya vazirligining regulation.adliya.gov.uz saytiga joylashtirildi.

Davlat dasturi loyihasida “O‘zbekiston – 2030” strategiyasining 5 ta yo‘nalishi belgilanib, uning ikkinchi yo‘nalishi bevosita ijtimoiy siyosat (ta’lim, tibbiyot, ijtimoiy himoya, yoshlar)ga bag‘ishlangan.

Mazkur Davlat dasturida nazarda tutilishicha, endilikda alohida ta’lim ehtiyojiga ega o‘quvchilar bilan ishlaydigan o‘qituvchilarni sertifikatlash amaliyoti yo‘lga qo‘yiladi.

Shuningdek, respublikaning har bir tumanida (shahrida) bosqichma-bosqich inklyuziv ta’lim talablariga javob beradigan kamida bittadan umumta’lim maktab faoliyati tashkil etiladi.