“Pravasiz” avtomobil boshqargan o‘quvchi YTH oqibatida vafot etdi

Samarqand viloyatidagi maktablarning birida 11-sinfda tahsil o‘quvchi o‘quvchi Lacetti rusumli avtomobilda YTHga uchrab, vafot etdi. Bu haqda Samarqand viloyati Yo‘l harakati xavfsizligi boshqarmasi xabar berdi.

Joriy yilning 12-fevral kuni, soat 12:30 da Samarqand viloyati, Jomboy tumani, Nogahon MFY hududidan o‘tuvchi ichki yo‘lda 2007-yilda tug‘ilgan, haydovchilik guvohnomasini olmagan, 54-maktabning 11-sinf o‘quvchisi Lacetti rusumli avtomobilini Jarqo‘rg‘on-Nogahon yo‘nalishi bo‘ylab boshqarib borayotib, e’tiborsizligi oqibatida rul boshqaruvini yo‘qotib, yo‘l chetidagi daraxtga urilib, yo‘l-transport hodisasini sodir etdi.

Natijada, tan jarohatlari olgan o‘quvchi Jomboy tumani markaziy shifoxonasiga yotqizilgan. Shifokorlarning ko‘rsatgan tibbiy yordamiga qaramasdan, o‘quvchi shifoxonada vafot etgan.

Bu kabi holatlarning oldini olish maqsadida, hodisa sodir bo‘lgan mahalladagi o‘quvchining tahsil olgan 54-umumta’lim maktabida Samarqand viloyati IIB, jamoat xavfsizlik xizmati, Yo‘l harakati xavfsizligi boshqarmasi boshlig‘i, polkovnik Shavkat Bayxurazov boshchiligida mahalla fuqarolar yig‘ini raisi, mahalla yettiligi, mutasaddi tashkilot rahbarlari, umumta’lim maktabi direktori va sinf rahbarlari, maktab o‘quvchilari hamda keng jamoatchilik ishtirokida tanqidiy ruhda yig‘ilish o‘tkazildi.

Yig‘ilish davomida yo‘l harakati qoidalarini sinf rahbarlarining tarbiyaviy soatlarida yaxshiroq o‘qitilishi lozimligi ta’kidlangan.