Deputatlar ham 5 kunlik o‘qish tizimi haqida gapira boshladi

Oliy Majlis Qonunchilik palatasi deputati Shaxnoza Xolmaxamatova “Ta’lim tizimini to‘liq 5 kunlik o‘qish va ish rejimiga o‘tkazish” mavzusiga e’tibor qaratdi.

“O‘zbekiston Konstitutsiyasining 40-moddasiga ko‘ra, har bir fuqaro davlat organlariga murojaat qilish huquqiga ega. “Mening fikrim” ana shu huquqni amalga oshirish uchun qulay va ochiq platforma bo‘lib xizmat qilmoqda.

Hozirgi kunda “Mehnat munosabatlariga “platforma ishchilari” tushunchasini kiritish”, “Ota-onalar 100 ballik ta’lim tizimiga qarshi!”, “Ta’lim tizimini to‘liq 5 kunlik o‘qish va ish rejimiga o‘tkazish” mavzusidagi murojaatlar “Mening fikrim” veb-portal orqali ko‘rib chiqilmoqda. 

Murojaatlar ichida keng jamoatchilik muhokamasida bo‘lib turgan  “Ta’lim tizimini to‘liq 5 kunlik o‘qish va ish rejimiga o‘tkazish” mavzusida bo‘lib, bugungacha 153 829 ta ko‘rilgan hamda fuqarolar tomonidan 657 ta izoh qoldirilgan. 

Mazkur murojaat 6 kun ichida jami 12 660 ta ovoz to‘plagan. Ovozlarning 12 527 tasi (98,9) qo‘llab-quvvatlovchi, 133 tasi (1,1%) qarshi ovozni tashkil etgan. Bugungi kunda ushbu murojaat 10 mingdan ziyod ovoz to‘plagani bois, Vazirlar Mahkamasiga ko‘rib chiqish uchun yuborildi. Qabul qilinadigan qaror veb-portalda e’lon qilinadi.

Prezidentimiz ta’kidlaganlaridek, qonun loyihalarining hayotiy va aniq ijro mexanizmiga ega bo‘lishi zarur. Bu esa jamoatchilik ishtirokini kengaytirish, ilmiy tahlillar va platformalardan kelayotgan takliflarni hisobga olish orqali amalga oshadi”, deb yozmoqda deputat.

Deputatlarning ham bu borada fikr bildira boshlagani keng jamoatchilikda yana muhokamalarning boshlanishiga, soha mutaxassislari va ota-onalarda savollar, takliflar paydo bo‘lishiga sabab bo‘ladi. 

Bu esa, o‘z navbatida, 5 kunlik ta’lim tizimiga o‘tish masalasini chuqurroq o‘rganish, tajribalarni tahlil qilish va uni amalda tatbiq etish imkoniyatlarini ko‘rib chiqish zarurligini yuzaga chiqaradi.

Umuman olganda, deputatlarning bu masalaga aralasha boshlagani hozircha sukut saqlayotgan mas’ullar uchun uyg‘otuvchi signal bo‘lishi mumkin. Bu esa 5 kunlik ta’lim rejimiga o‘tish masalasi nafaqat og‘zaki muhokamalarda, balki real amaliy qarorlar bosqichiga o‘tishi ehtimolini ham oshiradi.