“B2 sertifikati yo‘q o‘qituvchilarni ishdan bo‘shatish haqida ko‘rsatma bermaganmiz” — vazirlik

Ma’lumki, ingliz, fransuz, nemis, ispan, italyan, arab, xitoy, yapon, koreys, turk, fors, pushtu, dari, urdu va hind tillardan dars beradigan pedagoglar xorijiy til o‘qituvchilari hisoblanadi.

Vazirlar Mahkamasining 2021-yil 19-maydagi 312-sonli qarorining 9-bandida 2025/2026-o‘quv yiliga qadar umumiy o‘rta, o‘rta maxsus va professional ta’lim muassasalarida faoliyat yuritayotgan barcha xorijiy tillar o‘qituvchilari kamida B2 darajadagi milliy yoki unga tenglashtirilgan mos darajadagi xalqaro sertifikatga ega bo‘lishi lozimligi belgilangan.

Shuningdek, Maktabgacha va maktab ta’limi vazirligi xorijiy til o‘qituvchilariga 2025/2026-o‘quv yiliga qadar B2 darajadagi sertifikatlarga ega bo‘lish lozimligi haqida qat’iy ogohlantirish bergan. 

Keyinroq hududiy maktabgacha va maktab ta’limi boshqarmalari tomonidan umumiy o‘rta ta’lim maktabi direktorlariga ham rasmiy ko‘rsatmalar berilib, maktablarda faoliyat yuritayotgan xorijiy til o‘qituvchilari to‘g‘risida tahliliy ma’lumotlarni taqdim etish so‘ralgan.

Bu orada maktab direktorlari tomonidan tegishli sertifikatga ega bo‘lmagan pedagoglar bilan mehnat shartnomasi bekor qilinishi haqida ogohlantirish xatlari berildi.

Shundan so‘ng, O‘zbekiston ta’lim va fan xodimlari kasaba uyushmasi Respublika Kengashi bunday holat mehnat qonunchiligiga zid ekanligi, bu bo‘yicha tushuntirish berishi haqida Maktabgacha va maktab ta’limi vazirligiga so‘rov xati yuborgani ma’lum bo‘ldi.

Maktabgacha va maktab ta’limi vazirligi esa O‘zbekiston ta’lim va fan xodimlari kasaba uyushmasi Respublika Kengashining B2 sertifikati yuzasidan yozgan xatiga javob yo‘llab, hududiy boshqarmalar va tizim tashkilotlariga joriy o‘quv yilidan boshlab xorijiy tillarni o‘zlashtirish darajasi bo‘yicha kamida B2 darajadagi milliy yoki unga tenglashtirilgan mos darajadagi xalqaro sertifikatga ega bo‘lmagan xorijiy tillar o‘qituvchilari bilan tuzilgan mehnat shartnomalarini bekor qilish yuzasidan rasmiy ko‘rsatma berilmaganligi ma’lum qildi.

Vazirlikning izoh berishicha, Mehnat kodeksi 10-moddasiga ko‘ra, mehnat to‘g‘risidagi qonunchilik ushbu Kodeksdan hamda yakka tartibdagi mehnatga oid munosabatlarni va ular bilan bevosita bog‘liq bo‘lgan ijtimoiy munosabatlarni tartibga soluvchi boshqa qonunchilik hujjatlaridan iboratdir.

Mazkur kodeksning 19-moddasida, xodim va ish beruvchi yakka tartibdagi mehnatga oid munosabatlarning subyektlari ekanligi belgilangan.

Shunga muvofiq, Mehnat kodeksida, boshqa qonunlarda nazarda tutilgan tartibda va shartlar asosida mehnat shartnomasini tuzish, o‘zgartirish hamda bekor qilish bevosita yakka tartibdagi mehnatga oid munosabatlarning subyektlari o‘rtasida hal etilishi lozim.

O‘zbekiston Respublikasi “Ta’lim to‘g‘risida”gi qonunining 23-moddasiga asosan O‘zbekiston Respublikasi Vazirlar Mahkamasi ta’lim sohasidagi yagona davlat siyosatini amalga oshiradi. 

Vazirlar Mahkamasining 2021-yil 19-maydagi “Xorijiy tillarni o‘rganishni ommalashtirishni samarali tashkil etish chora-tadbirlari to‘g‘risida” 312-son qarorining 9-bandiga muvofiq, 2025/2026-o‘quv yiliga qadar umumiy o‘rta, o‘rta maxsus va professional ta’lim muassasalarida faoliyat yuritayotgan barcha xorijiy tillar o‘qituvchilari kamida B2 darajadagi milliy yoki unga tenglashtirilgan mos darajadagi xalqaro sertifikatga ega bo‘lishi lozimligi belgilangan.

Shuningdek, vazirlik o‘quvchilarga sifatli ta’lim berilishi va til bilish ko‘nikmalarini lozim darajada egallashlari uchun ularga ta’lim beradigan pedagoglarning bilim darajasi (shu bilan birga til bilish darajasining asosi sifatida tegishli sertifikatga ega bo‘lishi) yetarli bo‘lishi lozimligi muhim ahamiyatga ega ekanligini alohida eslatib o‘tgan.