Maktabgacha va maktab ta’limi tizimi qonunbuzilish murojaatlari soni bo‘yicha “yetakchi” sohalardan biri deb topildi

Davlat mehnat inspeksiyasi tomonidan 2025-yilda eng ko‘p qonunbuzilish holatlari yuzasidan murojaatlar kelib tushgan sohalar bo‘yicha ma’lumotlarni ochiqladi.

Ma’lum bo‘lishicha, qonunbuzilish holatlari yuzasidan eng ko‘p murojaatlar bo‘yicha maktabgacha va maktab ta’limi tizimidagi muassasalar ikkinchi o‘rinni — qurilish tashkilotlaridan keyingi, tibbiyot muassasalaridan oldingi o‘rinni egallagan.

Bunda maktab va maktabgacha ta’lim muassasalaridan o‘tgan 2025-yil davomida jami 3 041 ta murojaat kelib tushgan.

Maktab va maktabgacha ta’limi sohasida asosan mehnat shartnomasining rasmiylashtirilmasligi, ish vaqti va dam olish rejimiga rioya etilmasligi hamda noqonuniy ishdan bo‘shatish kabi holatlar bo‘yicha murojaatlar kelib tushgan.

Eslatib o‘tamiz, 2024-yilda Maktabgacha va maktab ta’lim tizimi mehnat qonunchiligi eng ko‘p buzilgan sohalardan biri deb topilgandi.

Ya’ni, 2024-yilda Maktabgacha va maktab ta’limi vazirligi tizimida ishga tiklash, ish haqi undirish va boshqa mehnat nizolari bilan bog‘liq sudlarda ko‘rilgan jami 2 078 ta fuqarolik ishining 1 364 tasi (66 foiz) qanoatlantirilib, tizimda mehnat qonunchiligi normalari buzilishi oqibatida da’vogarlar foydasiga 14 mlrd so‘m ish haqi hamda qo‘shimcha 2,5 mlrd so‘mlik majburiy progul uchun haq va ma’naviy zararlar undirish haqida qarorlar qabul qilingan.