Jismoniy tarbiya o‘qituvchilari uchun amaliy imtihon sanasi aniq bo‘ldi

Ma’lumki, jismoniy tarbiya fani o‘qituvchilariga toifa berishning ikki bosqichli yangi tartibi ishlab chiqilgan bo‘lib, bunda birinchi bosqich — test shaklida Maktabgacha va maktab ta’limi vazirligi tomonidan, ikkinchi bosqich — amaliy imtihon shaklida Sport vazirligi tomonidan o‘tkazilishi belgilangan.

Maktabgacha va maktab ta’limi vazirligi hamda Sport vazirligining 2026-yil 7-apreldagi “Maktabgacha va maktab ta’limi vazirligi tizimidagi umumiy o‘rta ta’lim tashkilotlarining jismoniy tarbiya fani pedagog kadrlarini o‘quv fanidan malaka sinovlarini tashkil etish to‘g‘risida”gi 23-q/q, 12-q/q-sonli qaroriga muvofiq 2026-yil 12–20-may kunlari jismoniy tarbiya fani o‘qituvchilari uchun o‘quv fanidan ikkinchi bosqich amaliy imtihonlar o‘tkazilishi belgilandi.

Shuningdek, Sport vazirligining 2026-yil 1-maydagi buyrug‘i bilan malaka sinovlarini amaliy imtihon shaklida o‘tkazish reja-jadvali hamda hududiy ishchi guruhlar va baholash komissiyasi tarkibi ham tasdiqlandi.

Mazkur amaliy imtihon jarayonlari Sport vazirligining 2026-yil 1-maydagi buyrug‘i bilan tasdiqlangan sport maktablarida bo‘lib o‘tadi.

12–20-may kunlari o‘tkaziladigan amaliy imtihon jarayonlari yakunlanganidan so‘ng baholash komissiyasi natijalarni shu kunning o‘zida “Toifa imtihon” quyi moduliga kiritadi. 

Bunda amaliy imtihon jarayonlarini ovozli va videotasvirga olinadi hamda video tasvirlar kamida bir yil saqlanadi. Amaliy imtihon natijalari umumlashtiriladi hamda tasdiqlangan natijalar jarayon yakunlanganidan so‘ng besh kun muddatda Maktabgacha va maktab ta’limi vazirligiga taqdim etiladi.

Amaliy imtihon natijalaridan norozi bo‘lgan pedagog kadrlarning murojaatlarini malaka sinov natijalari e’lon qilingan kundan boshlab o‘n kun mobaynida Sport vazirligi tomonidan tuzilgan apellyatsiya komissiyasi pedagog xodim ishtirokida ko‘rib chiqiladi.

Pedagog xodimlar qo‘shimcha ma’lumotlar bilan quyidagi havolalar orqali tanishib chiqishi mumkin

Umumiy o‘rta ta’lim tashkilotlarining jismoniy tarbiya fani o‘qituvchilari uchun amaliy imtihon sinovlarining jismoniy tayyorgarlik darajasi normativi;

Umumiy o‘rta ta’lim tashkilotlarining jismoniy tarbiya fani o‘qituvchilari uchun amaliy imtihonlarining sport turlari bo‘yicha mashqlar texnikasi va baholash mezonlari;

Imtihonlar oʻtkaziladigan manzillar hamda aniq sanalar.

Eslatib o‘tamiz, amaliy imtihonlarda ishtirok etish uchun pedagog xodimlar o‘zlari bilan shaxsni tasdiqlovchi hujjat (pasport yoki ID-karta) olib kelishlari talab etiladi.