O‘qituvchilarning malaka toifasi hisobga olingan holda ustama ballari qayta hisoblanadi

Ma’lumki, Vazirlar Mahkamasining 2025-yil 21-oktabrdagi 662-sonli qarori bilan Vazirlar Mahkamasining 2019-yil 30-sentabrdagi 823-son qarori bilan tasdiqlangan “Umumiy o‘rta ta’lim muassasalarining o‘rnak ko‘rsatgan xodimlarini rag‘batlantirishning direktor jamg‘armasini tashkil etish va uning mablag‘laridan foydalanish tartibi to‘g‘risida”gi nizomga qo‘shimcha va o‘zgartirishlar kiritilgan.

Qaror bilan o‘qituvchilar faoliyatini baholash mezonlaridagi 9-ko‘rsatgich, ya’ni, o‘qituvchining pedagoglik faoliyatini baholash mezoni chiqarib tashlanib, uning o‘rniga malaka toifasiga qarab o‘qituvchilarga ball qo‘shib berilishi belgilandi.

Bunda o‘qituvchilarga amaldagi malaka toifasiga qarab quyidagicha ball beriladi

• Mutaxassis lavozimida bo‘lsa – 0 ball;

• Ikkinchi malaka toifasiga ega bo‘lsa — 5 ball;

• Birinchi malaka toifasiga ega bo‘lsa — 10 ball;

• Oliy malaka toifasiga ega bo‘lsa — 20 ball beriladi.

Ma’lumki, joriy yilning aprel-may oylarida pedagoglar uchun malaka toifa sinovlari bo‘lib o‘tdi. Bunda attestatsiya jarayonlari to‘liq yakunlanganidan so‘ng bir oy muddat ichida vazirlikning tegishli buyrug‘i bilan attestatsiya natijalariga ko‘ra oliy, birinchi va ikkinchi malaka toifalari hamda bosh, yetakchi va katta o‘qituvchi lavozimlari berilgan pedagog kadrlarning ro‘yxati tasdiqlanadi.

Mazkur ro‘yxatga asosan pedagog kadrlarga QR-kod qo‘yilgan elektron shakldagi sertifikatlar pedagog.uzedu.uz platformasi orqali onlayn generatsiya qilinadi. Bu jarayon esa 31-maydan boshlab iyun oyining so‘nggi kunigacha davom etishi belgilangandi. 

Ammo attestatsiya sinovidan muvaffaqiyatli o‘tib, tegishli malaka toifasini qo‘lga kiritgan pedagog xodimlarga direktor jamg‘armasi hisobidan ustama tayinlashda tushunmoqvchiliklar kelib chiqa boshladi. 

Aslida esa pedagog xodimning malaka toifasi bilan bog‘liq huquqiy maqomi attestatsiya natijalari tasdiqlangan paytdan boshlab vujudga kelgan hisoblanadi. Pedagogga QR-kod qo‘yilgan elektron sertifikatni shakllantirish esa Maktabgacha va maktab ta’limi vazirligi tomonidan amalga oshiriladigan texnik va tashkiliy jarayon bo‘lib, mazkur jarayonning yakunlanmaganligi pedagog xodimning malaka toifasiga ega bo‘lganligi faktini inkor etmasligi lozim.

Shu sababli, direktor jamg‘armasi hisobidan ustama tayinlashda pedagogning amalda mavjud bo‘lgan va belgilangan tartibda qo‘lga kiritilgan malaka toifasi inobatga olinishi lozim. Sertifikatning generatsiya qilinmaganligi yoki pedagogga taqdim etilmaganligi uning huquqini cheklash uchun asos bo‘la olmaydi.

Mazkur holatda pedagog xodimga avvalgi malaka toifasi uchun emas, attestatsiya natijalariga ko‘ra berilgan malaka toifasi uchun nazarda tutilgan ball qo‘yilishi maqsadga muvofiq hisoblanadi.

Ustama ballari qayta hisoblanadi

Pedagoglarga direktor jamg‘armasi hisobidan ustama tayinlash jarayonida malaka toifasi uchun ball berish amaliyoti yangi joriy etilgani sababli ayrim hududlarda ballarni hisoblash bilan bog‘liq turli tushunmovchiliklar kuzatilgandi.

Mazkur muammolarning oldini olish maqsadida Maktabgacha va maktab ta’limi vazirligi pedagoglarning malaka toifasi sertifikatlarini muddatidan oldin shakllantirish choralarini ko‘rdi.

Shuningdek, vazirlikning 2026-yil 17-iyundagi 05-14-3905-son ko‘rsatma xatiga muvofiq, pedagog xodimlarga yangi malaka toifasi bo‘yicha ball berilmagan taqdirda pedagog xodimlarning yangilangan malaka toifalaridan kelib chiqib ustamalarni qayta ko‘rib chiqish  bo‘yicha topshiriq berildi.

Unga ko‘ra, pedagog xodimlarining bazaviy tarif stavkasiga har oylik ustama belgilash bo‘yicha ishchi guruhlar pedagoglarga qo‘yilgan ballarni qayta hisob-kitob qiladi hamda zarur hollarda ustama tayinlash to‘g‘risidagi buyruqlarga tegishli qo‘shimcha va o‘zgartirishlar kiritadi.