Vazirlik xususiy ta’lim tashkilotlariga kameralar o‘rnatish majburiy ekanligini eslatdi

Maktabgacha va maktab ta’limi vazirligi nodavlat ta’lim tashkilotlarini ichki va tashqi kameralar bilan ta’minlash majburiy etib belgilanganligi, belgilangan litsenziya talablari va shartlarining buzilishi litsenziyani bekor qilinishiga asos bo‘lishini eslatdi. 

Ma’lum qilinishicha, Vazirlar Mahkamasining 2026-yil 21-maydagi 271-son qaroriga muvofiq, Vazirlar Mahkamasining 2022-yil 21-fevraldagi 80-son qarori bilan tasdiqlangan “Maxsus elektron tizim orqali ayrim faoliyat turlarini litsenziyalash tartibi to‘g‘risida”gi yagona Nizomga tegishli o‘zgartirishlar kiritilgan. 

Unga ko‘ra 1-iyuldan boshlab — nodavlat ta’lim xizmatlari ko‘rsatiladigan bino va xonalar onlayn translyatsiya qilish imkoniyatiga ega bo‘lgan, ovoz yozish moslamalik ichki va tashqi kameralar bilan ta’minlanishi majburiy talab sifatida belgilangan. Bunda videoyozuv qaydlari kamida olti oygacha saqlab boriladi. 

Vazirlikning qayd etishicha, hozirgi kunda vazirlik tomonidan bugungi kunga qadar faoliyat yuritib kelayotgan va yangi ish boshlayotgan nodavlat ta’lim tashkilotlarida mazkur qonunchilik talablarini bajarish hamda uning uzluksiz ishlashini ta’minlash maqsadida zarur choralar ko‘rilmoqda. 

Shuningdek, vazirlik “Litsenziyalash, ruxsat berish va xabardor qilish tartib-taomillari to‘g‘risida”gi Qonuniga ko‘ra, belgilangan litsenziya talablari va shartlarining buzilishi litsenziyani bekor qilinishiga asos bo‘lishini eslatib o‘tdi.