Bu yil 1696 nafar o‘qituvchiga qariyb 7 mln 500 ming so‘mlik vazir ustamasi beriladigan bo‘ldi

Maktabgacha va maktab ta’limi vazirining tegishli buyrug‘i bilan, vazir jamg‘armasi hisobidan har oylik ustama to‘lanadigan 1 696 nafar malakali pedagog kadrlar ro‘yxati tasdiqlandi. Vazir ustamasi uchun ajratilgan 204 ta joy esa bo‘sh qoldi. 

Bunda umumiy o‘rta ta’lim maktablaridan 1 400 nafar, ixtisoslashtirilgan ta’lim muassasalaridan 98 nafar hamda maktabgacha ta’lim tashkilotlaridan 198 nafar pedagog vazir ustamasiga tavsiya etilgan.

2026-yilda Vazir jamg‘armasi hisobidan har oylik ustama to‘lanadigan malakali pedagog kadrlarning cheklangan soni 1 900 nafar etib belgilangandi.

Kvotalar “Maktabgacha ta’lim”, “Boshlang‘ich ta’lim”, “Filologiya fanlari”, “Ijtimoiy fanlar”, “Aniq fanlar”, “Tabiiy va iqtisodiy fanlar”, “Amaliy fanlar” yo‘nalishlari bo‘yicha Qoraqalpog‘iston Respublikasi, viloyatlar va Toshkent shahri kesimida taqsimlangan.

Endilikda g‘oliblarga 2026-yil sentabr oyidan 2027-yil may oyiga qadar, jami 9 oy davomida quyidagi miqdorda ustama to‘lanadi:

• umumta’lim tashkilotlari pedagoglariga — Mehnatga haq to‘lashning eng kam miqdori 5,5 baravari — 7 mln 480 mimg so‘m;

• maktabgacha ta’lim tashkilotlari tarbiyachilariga — Mehnatga haq to‘lashning eng kam miqdori 2 baravari — 2 mln 992 ming so‘m.