Vazir ustamasi bo‘yicha apellyatsiya yuborish imkoniyati cheklab qo‘yildimi?

Xabaringiz bor, ayni vaqtda Maktabgacha va maktab ta’limi vaziri jamg‘armasi hisobidan ustama to‘lanadigan pedagoglarni aniqlash uchun saralash sinovlarining 2-bosqichi — kasbiy mahoratni baholash bo‘yicha suhbat jarayonlari o‘tkazilmoqda. Jarayon joriy yilning 2–6-iyun kunlari belgilangan reja-grafikka muvofiq hududiy Pedagogik mahorat markazlarida o‘tkazilishi nazarda tutilgan.

Maktabgacha va maktab ta’limi vazirligi ishlab chiqqan tartibga ko‘ra, agar pedagoglar suhbat natijalaridan norozi bo‘lsa, natijalar e’lon qilingan vaqtdan boshlab 48 soat ichida pedagog.uzedu.uz platformasidagi shaxsiy kabinetlari orqali murojaat qilishlari mumkin.

Bir guruh pedagoglarning xalqtaliminfo.uz'ga ma’lum qilishicha, joriy yil 2-iyundan suhbat jarayonlari boshlangan bo‘lsa-da, suhbat natijalaridan norozi pedagoglar uchun apellyatsiya shikoyati yuborish imkoniyati cheklab qo‘yilgan.

Ayni vaqtda apellyatsiya yuborish muddatining dastlabki 24 soati yakunlandi. Agar vazirlik qolgan 24 soat davomida ham nomzodlarga apellyatsiya yuborish imkoniyatini bermasa, belgilangan muddat tugashi oqibatida yuborilgan murojaatlar ko‘rib chiqilmay qolishi mumkin.

Aslida nomzodlar pedagog.uzedu.uz platformasidagi shaxsiy sahifasining “Apellyatsiyalarim” bo‘limi orqali “Apellyatsiya yuborish” tugmasini bosib, kerakli ma’lumotlarni kiritgan holda murojaat yuborishi kerak edi. Ammo hozirgi vaqtda ushbu xizmat yo‘lga qo‘yilmaganligi aytilmoqda.

Shu sababli, Maktabgacha va maktab ta’limi vazirligi holatga to‘liq izoh berishi, tizimda texnik xatolik kuzatilgan taqdirda har bir kechiktirilgan vaqt uchun pedagoglar uchun apellyatsiya berish muddatini uzaytirishi zarur.

Eslatib o‘tamiz, avvalroq “Yil o‘qituvchisi” tanlovining ikkinchi bosqich natijalari e’lon qilingan vaqtda ham vazirlik pedagoglarga apellyatsiya shikoyati yuborish imkoniyatini cheklab qo‘ygandi. Keyinroq, xalqtaliminfo.uz'da e’lon qilingan tanqidiy maqoladan so‘nggina ushbu xizmat yo‘lga qo‘yilgandi.