Endilikda maktablardagi davomat qay tartibda yuritiladi?

09:00 / 25.03.2024 11.84k

Maʼlumki, “Xavfsiz maktab” konsepsiyasini keng joriy etish, “Oila-mahalla-maktab” uzviy tizimi asosida voyaga yetmaganlar bilan manzilli ishlashni yo‘lga qo‘yish maqsadida 2024-yil 26-fevralda Maktabgacha va maktab taʼlimi vazirligi hamda Milliy gvardiya o‘rtasida 4-k/k va 5-k/k sonli qo‘shma qaror imzolangan.

Mazkur qo‘shma qaror bilan tasdiqlangan konsepsiyaga muvofiq endilikda maktablardagi davomat quyidagi tartibda yuritilishi belgilangan:

har kuni fan o‘qituvchilari (sinf rahbarlari) tomonidan o‘quvchilarning davomatini e-Maktab elektron platformada qayd etiladi;

maʼnaviy-maʼrifiy ishlar bo‘yicha direktor o‘rinbosari sababsiz darsga kelmagan o‘quvchilarni aniqlab, ro‘yxatini shakllantiradi va inspektor-psixolog, biriktirilgan Milliy gvardiya xodimlariga taqdim etadi;

maktab maʼmuriyati, inspektor-psixolog va biriktirilgan Milliy gvardiya hamkorligida o‘quvchilarning taʼlim olish jarayoniga taʼsir qilmagan holda ularning davomatini yuritadi;

o‘quvchilar davomatini tahlil qilish uchun e-Maktab elektron platformasi orqali maʼlumotlar olinadi, dars jarayonlarini buzishga yo‘l qo‘yilmaydi;

Milliy gvardiya xodimi sababsiz darsga kelmagan o‘quvchilar to‘g‘risidagi maʼlumotni “Mahalla yettiligi” va mahallada tashkil etilgan ishchi guruhlarga yetkazadi;

“Mahalla yettiligi” va Milliy gvardiya xodimi sababsiz dars qoldirgan o‘quvchilarning yashash manziliga borib, ota-ona bilan profilaktik suhbat o‘tkazadi va bolani darsga qaytarish chorasini ko‘radi;

zaruratga ko‘ra, farzandining taʼlim olishiga to‘sqinlik qilgan va majburiyatini bajarmagan ota-onaga maʼmuriy chora ko‘riladi;

har hafta “Mahalla yettiligi” va Milliy gvardiya xodimi o‘quvchilarni darsga qaytarish bo‘yicha ko‘rilgan choralar yuzasidan muvofiqlashtiruvchi shtabga va maktab maʼmuriyatiga maʼlumot kiritib boradi;

har bir maktab bo‘yicha surunkali ravishda dars qoldiruvchi o‘quvchilar ro‘yxati tuzilib, ular toifalarga ajratiladi (dars mashg‘ulotiga 3 kundan ortiq sababsiz qatnashmagan o‘quvchilar surunkali dars qoldirgan hisoblanadi);

darsda surunkali (muntazam) qatnashmaydigan o‘quvchilar “qizil” toifaga, kechikib keluvchilar “sariq” toifaga ajratiladi;

maktab maʼmuriyati, inspektor-psixolog tomonidan “Mahalla yettiligi” aʼzolarining biri ishtirokida “qizil” va “sariq” toifalarga ajratilgan o‘quvchining yashash manziliga borib, ota-onasi bilan farzandining surunkali maktabga kelmaganlik holati bo‘yicha profilaktik suhbat o‘tkaziladi va sabablariga aniqlik kiritiladi;

surunkali (muntazam) dars qoldiruvchi o‘quvchilarning ota-onasiga “Mahalla yettiligi” aʼzolarining biri tomonidan ikki marotaba rasmiy ogohlantirish xati taqdim etiladi, o‘zgarish bo‘lmagan hollarda Maʼmuriy javobgarlik to‘g‘risidagi kodeksning 47-moddasiga muvofiq ota-onani (ularning o‘rnini bosuvchi shaxsni) javobgarlikka tortish chorasi ko‘riladi.