Chet tili fani uchun ajratilgan haftalik oʻquv soatlari qanday taqsimlanadi?

08:00 / 02.05.2024 3.73k

Xabaringiz bor, Maktabgacha va maktab taʼlimi vazirining 2024-yil 3-martdagi 94-sonli buyrug‘i bilan umumiy oʻrta taʼlim maktablari uchun 2024-2025-oʻquv yiliga moʻljallangan tayanch oʻquv reja tasdiqlandi.

Unga ko‘ra chet tili fani uchun ajratilgan haftalik oʻquv soatlari quyidagicha taqsimlanadi:

1-sinfda 1 soatdan;
2-4-sinflarda 2 soatdan;
5-6-sinflarda 4 soatdan;
7-10-sinflarda 3 soatdan;
11-sinfda 2 soatdan oʻqitiladi.

2024-2025-oʻquv yilidan boshlab bosqichma-bosqich chet tili fani 5-9-sinflarda intensivlikni oshirish orqali oʻquvchilarda bazaviy bilim va nutqiy koʻnikmalar shakllantirish hamda 10-11-sinflarda akademik yozuv va soʻzlashish koʻnikmalarini rivojlantirishga qaratiladi.

Umumiy oʻrta taʼlim muassasalarida xorijiy (ingliz, nemis, fransuz va boshqa) tillardan birini chet tili fani sifatida oʻqitishda ota-onalarning talabi va oʻquvchilarning xohish-istaklari, shuningdek, taʼlim muassasasida ushbu fan boʻyicha malakali fanoʻqituvchisi mavjudligi inobatga olinishi lozim.

Bunda, umumiy oʻrta taʼlim muassasasining Kuzatuv kengashi 1-sinflarda ota-onalarning talabi va oʻquvchilarning xohish-istaklari asosida ular tomonidan tanlangan chet (ingliz, nemis, fransuz va boshqa) tillardan birini chet tili fani sifatida oʻqitish toʻgʻrisidagi iltimosnoma bilan taʼlim muassasasining Pedagogik kengashiga murojaat qiladi.

Ushbu murojaat taʼlim muassasasining Pedagogik kengashida muhokama qilinadi va kengashning ushbu fanni chet tili sifatida oʻqitilishi yoki asosli sabablari koʻrsatilgan holda oʻqitish imkoniyati yoʻqligi toʻgʻrisida qaror qabul qiladi.

Mazkur qaror asosida chet (ingliz, nemis, fransuz va boshqa) tillardan biri umumtaʼlim maktabida yoki maʼlum bir sinfida chet tili fani sifatida oʻqitiladi.