30 mingdan ortiq o‘quvchi “Barkamol avlod bolalari” festivalida qatnashdi

17:00 / 29.05.2024 2.23k

Ma’lumki, Maktabgacha va maktab ta’limi vazirligi huzuridagi Respublika “Barkamol avlod” bolalar maktabi o‘quvchilarning bo‘sh vaqtlarini mazmunli tashkil etish, ularning maktabdan tashqari ta’lim sohasidagi bilimlarini mustahkamlash maqsadida respublika bo‘ylab yil davomida “Barkamol avlod bolalari” festivalini tashkil qilib keladi. Yaqinda esa mazkur festivalga start berilgandi.

Festival Andijon viloyatida quyidagi yo‘nalishlarda bo‘lib o‘tdi:

“Madaniyat va san’at” yo‘nalishi (Tasviriy san’at va libos);
“Texnika, konstruktorlik va modellashtirish” yo‘nalishi (Robototexnika va konstruktorlik);
“Jismoniy tarbiya va sport” yo‘nalishi (Shaxmat-shashka);
“Hunarmandchilik va qo‘l mehnati” yo‘nalishi (Munchoqli bezak);
“Turizm va ekologiya” yo‘nalishi (Karving);
“Oliy ta’lim muassasalari va maktabga tayyorlov” yo‘nalishi (Mental arifmetika);
“Xorijiy tillar” yo‘nalishi (Ingliz tili).

Festivalda Andijon viloyatining o‘zidan umumiy 30 ming nafardan ortiq o‘quvchi-yoshlar qatnashdi.

Tanlov kuy-qo‘shiqlar bilan ko‘tarinki kayfiyatda tashkil etildi. Festival g‘oliblari va faol ishtirokchilarga esa diplomlar, sovrinlar va esdalik sovg‘alari topshirildi.

Eslatib o‘tamiz, festivaldan maqsad to‘garaklardagi o‘quvchilar qamrovini oshirish, ichki turizmni rivojlantirish, tajriba almashish, to‘garaklar faoliyati bilan tanishish, madaniy-ommaviy tadbirlarni samarali tarzda o‘tkazish hamda ta’lim jarayonini turli innovatsion metodlardan foydalangan holda tashkil etishdan iborat.

Fotogalereya