Endi o‘quvchilar maktabga istalgan kiyimda kelishi mumkinmi?

Savol

Yagona maktab formasini joriy etish talabi hozir mavjud bo‘lmagani uchun ayrim ota-onalar endi bolalarimiz o‘zlari istagan kiyimda maktabga borsa bo‘laveradimi deb savol beryapti.

Yo‘q, hozircha qora shim, oq ko‘ylakda kelsin desak, ayrim ota-onalar hukumat qarori bekor bo‘lgan-ku, deb bizga e’tiroz bildirishyapti. Ota-onalarning talabi to‘g‘rimi?

Javob

Ota-onalarning bu talabi noto‘g‘ri. To‘g‘ri, Vazirlar Mahkamasining 2022-yil 3-oktyabrdagi 558-sonli qarori bilan davlat umumiy o‘rta ta’lim muassasalarida o‘quvchilar uchun tasdiqlangan shakllardagi yagona maktab formasini joriy etish talabi bekor qilingan.

Ammo shunday bo‘lsa-da, o‘quvchilar ta’lim muassasasiga maktab ustavida belgilangan yoki ichki tartib va odob-axloq qoidalarida belgilangan formada kelishlari shart.

Ya’ni, faqatgina yagona maktab formasi bekor qilingan, oddiy ko‘rinishdagi maktab formasi emas. Hozir mazkur ikki tushunchaning farqlarini tushuntirishga harakat qilamiz.

Yagona maktab formasi – bu hukumat tomonidan belgilangan va barcha maktablar uchun bir xil dizayn va rangdagi forma.

Oddiy maktab formasi – bu har bir maktabning o‘z ixtiyoriga ko‘ra tanlagan o‘ziga xos dizayn va rangdagi formasidir. Bunda har bir maktab o‘zi uchun mos bo‘lgan forma turini tanlashi yoki tanlamasligi ham mumkin.

Maktabgacha va maktab ta’limi vazirligining 2023-yil 31-avgustdagi 282-sonli buyrug‘i bilan tasdiqlangan “Umumiy o‘rta ta’lim muassasasining takomillashtirilgan namunaviy odob-axloq qoidalari”ga ko‘ra, o‘quvchilarga ta’lim muassasasi Ustavida belgilangan formadan tashqari qiyofada, jumladan, o‘g‘il bolalar kalta shim, futbolka, shippakda va qiz bolalar kalta, ochiq, tor va tanani shaffof ko‘rsatuvchi kiyimda kelishi hamda bo‘yni va barmoqlariga turli xil taqinchoqlar taqishi taqiqlangan.

Shuningdek, o‘quvchilar toza va orasta kiyinishi, sochlarni ozoda va tartibga keltirilgan holda tutishlari lozim.

Demak, hukumat tomonidan yagona maktab formasi joriy qilinmagan bo‘lsa, u holda bu maktab ustavi bilan tartibga solinadi.

Shu sababli, har bir ta’lim muassasasi o‘zining ustavida o‘quvchilar uchun belgilangan maktab formasi ko‘rinishini tasdiqlab qo‘ygan bo‘lishi maqsadga muvofiq.

Xulosa qilib aytganda, barcha o‘quvchilar ta’lim muassasalarining Ustavi hamda ichki tartib va odob-axloq qoidalariga rioya qilishlari shart.