Yangi o‘quv yili 4-sentyabrdan boshlanadi

Vazirlar Mahkamasining 2017-yil 15-martdagi 140-sonli qarori bilan tasdiqlangan “Umumiy o‘rta ta’lim to‘g‘risida”gi Nizomga ko‘ra, umumta’lim muassasalarida o‘quv yili 2-sentyabrdan boshlanishi belgilangan.

Ammo Mehnat kodeksining 208-moddasiga muvofiq “1-sentyabr — O‘zbekiston Respublikasi mustaqillik kuni” 2024-yilda yakshanba — dam olish kunlariga to‘g‘ri kelishi munosabati bilan ushbu dam olish kuni mos ravishda 2024-yil 2-sentyabrga ko‘chirilgan.

O‘zbekiston Respublikasi Prezidentining 2023-yil 22-dekabrdagi PF-213-son Farmoniga ko‘ra, 3-sentyabr, seshanba ham ish haftasining turidan qat’i nazar, barcha xodimlar uchun qo‘shimcha dam olish kuni etib belgilangan.

Shuningdek, 31-avgust, shanba ham olti kunlik ish haftasida ishlaydigan xodimlar uchun qo‘shimcha dam olish kuni hisoblanadi. 

Ya’ni, Mustaqillik bayrami munosabati bilan ketma-ket 4 kun dam olish kuni bo‘ladi. Bunda:

• 31-avgust, shanba — 6 kunliklar uchun qo‘shimcha dam olish kuni, 5 kunliklar uchun odatiy dam olish kuni;

• 1-sentyabr, yakshanba — Mustaqillik bayrami;

• 2-sentyabr, dushanba — barcha uchun dam olish kuni (Mehnat kodeksining 208-moddasiga binoan bayram yakshanbaga to‘g‘ri kelsa, dam olish kuni dushanbaga ko‘chiriladi);

• 3-sentyabr, seshanba — barcha uchun qo‘shimcha dam olish kuni. 

• 4-sentyabr, chorshanba — maktablarda yangi o‘quv yili boshlanadi.