Psixolog lavozimi butunlay tugatildimi?

Savol

Psixolog shtat birligi to‘liq tugatildimi? Hozir amalda ishlab kelayotgan barcha psixologlar ishdan bo‘shatiladimi?

Javob

Joriy yilning 30-avgust kuni Maktabgacha va maktab ta’limi vazirligi 288-sonli buyrug‘i bilan ta’lim muassasalaridagi ayrim lavozimlar qisqarishi haqida xabar bergandik.

Mazkur buyruq bilan o‘quvchilar soni 1500 nafar bo‘lganda 1 shtat birlik, 1500 nafardan yuqori bo‘lganda 2 shtat birlik psixolog lavozimi ajratilishi belgilandi.

Lekin bu barcha psixologlar bilan mehnat shartnomasi bekor qilinishini anglatmaydi.

Ya’ni, 1 500 nafargacha o‘quvchi tahsil olayotgan maktablarda 1 shtat birlikda,  o‘quvchilar soni 1 500 va undan ortiq bo‘lganda 2 shtat birlikdagi psixolog lavozimi saqlab qolinadi.

Bunda o‘quvchilar soni 500 nafardan 1000 nafargacha bo‘lgan maktablardagi 0.5 stavkadagi psixolog shtati tugatilib, faqat 1 stavkadagi psixolog lavozimi qoldiriladi.

O‘quvchilar soni 1 500 nafardan 2 000 nafargacha bo‘lgan maktablardagi 0.5 stavka miqdorida ishlayotgan psixologlarning shtat birligi tugatildi.

Shuningdek, o‘quvchilar soni 2 ming nafar va undan ortiq bo‘lgan maktablardagi qo‘shimcha 1 ta psixolog shtat birliklari tugatilib, faqat 2 ta shtat birligi qoldiriladi. Avval shu son 3 ta shtat birlikni tashkil etardi.