MMTVga bo‘ysinadigan oliygohlarda “Qalqon” patrullari tashkil etiladi

Maktabgacha va maktab ta’limi vazirining 2026-yil 23-fevraldagi 76-sonli buyrug‘i bilan pedagogika oliy ta’lim tashkilotlarida “Qalqon” patrullarini tashkil etish to‘g‘risidagi nizom tasdiqlandi.

Unga ko‘ra, endilikda oliygoh talabalarining odob-axloq qoidalariga amal qilishini nazorat qiladigan hamda talabalar orasida xavfli xulq-atvor belgilarini barvaqt aniqlash va tegishli mas’ullarga axborot berish uchun xizmat qiladigan “Qalqon” patrullarini tashkil etiladi.

“Qalqon” patrullarini ixtiyoriylik tamoyili asosida, talabalar orasidan shakllantirilib, ularning faoliyati Yoshlar siyosati va ma’naviy-ma’rifiy ishlar bo‘yicha birinchi prorektor hamda ma’naviy-ma’rifiy ishlar bo‘yicha dekan o‘rinbosari tomonidan muvofiqlashtiriladi.

“Qalqon” patrullari:

• talabalarning odob-axloq qoidalariga amal qilishini nazorat qilish; 

• ta’lim tashkilotlarida sog‘lom turmush tarzini targ‘ib qilish, turli sport va fan to‘garaklariga jalb qilish, talabalarning huquqiy ongi va ma’naviy-ma’rifiy saviyasini oshirishga ko‘maklashish; 

• talabalar o‘rtasida giyohvandlik vositalari va psixotrop moddalarning zarari haqida targ‘ibot-tashviqot ishlarini olib borish; 

• talabalar orasida xavfli xulq-atvor belgilarini barvaqt aniqlash va tegishli mas’ullarga axborot berish, shu jumladan oliy ta’lim tashkilotlaridagi profilaktika inspektorlari bilan hamkorlik qilish; 

• ta’lim tashkiloti ma’muriyati, huquq-tartibot organlari va jamoat tashkilotlari bilan hamkorlik qilish; 

• ta’lim tashkiloti hududida xavfsizlik qoidalariga rioya etilishini nazorat qilishga ko‘maklashish bilan shug‘ullanadi.

“Qalqon” patrullari a’zolari 1 yil muddatga a’zolikka qabul qilinib, ta’lim tashkilotlarining talabalari orasidan 20-30 kishidan iborat tarkibda tuziladi va uning faoliyatiga Yoshlar siyosati va ma’naviy-ma’rifiy ishlar bo‘yicha birinchi prorektor va ma’naviy-ma’rifiy ishlar bo‘yicha dekan o‘rinbosari rahbarlik qiladi. 

Nizomda “Qalqon” patrullari a’zolari faoliyatini moliyalashtirish, ularni moddiy rag‘batlanish haqida so‘z bormagan. Katta ehtimol bilan patrullik xizmati jamoatchilik asosida tashkil qilinmoqda.