Bog‘chalardagi tarbiyachi yordamchisi lavozimi ham pedagogik faoliyat bilan bog‘liq lavozimlar ro‘yxatiga kiritilmoqda

Maktabgacha va maktab ta’limi vazirligining 2026-yil 9-iyundagi 37-mh-son va Oliy ta’lim, fan va innovatsiyalar vazirligining 2026-yil 5-iyundagi 37-q-q-son qarori bilan Pedagogik faoliyat bilan bog‘liq lavozimlar ro‘yxati tasdiqlangandi.

Unda oliy ta’lim, kasbiy va o‘rta maxsus ta’lim, umumiy o‘rta ta’lim, maktabgacha ta’lim, ta’lim uslubiyati bo‘yicha professional-mutaxassislar, maxsus ta’lim, ta’limning boshqa boshlang‘ich guruhiga kiritilmagan professional-mutaxassislar, ta’lim sohasi tarkibiy bo‘linmalari bo‘yicha jami 450 dan ortiq pedagogik faoliyat bilan bog‘liq lavozimlar ro‘yxati tasdiqlangandi.

Pedagogik faoliyat bilan bog‘liq lavozimlar ro‘yxatiga o‘zgartirish va qo‘shimchalar kiritish to‘g‘risidagi hujjat loyihasiga ko‘ra, maktabgacha ta’lim tashkilotidagi tarbiyachi yordamchisi lavozimi ham pedagogik faoliyat bilan bog‘liq lavozimlar ro‘yxatiga qo‘shilmoqda.

Pedagogik faoliyat bilan bog‘liq lavozimlar ro‘yxatining alohida tasdiqlashi huquqiy chalkashliklarning oldini oladi. Chunki ta’rif umumiy tushunchani ifodalasa, lavozimlar ro‘yxati aynan kimlar pedagog hisoblanishini amaliy jihatdan aniq belgilab beradi. 

Ya’ni qaysi lavozim egalari pedagog maqomiga ega bo‘lishi, kimlarga pedagoglarga oid imtiyoz va kafolatlar tatbiq etilishi, kimning ish staji pedagogik staj sifatida tan olinishi kabi masalalar aynan shu ro‘yxat orqali hal etiladi. 

Aks holda, turli tashkilot va idoralar “pedagog xodim” tushunchasini turlicha talqin qilishi, bu esa amaliyotda chalkashlik va pedagoglar huquqlariga oid muammolarni keltirib chiqarishi mumkin.