Attestatsiyada 80 ball yiqqan o'qituvchilar 6 mln so‘mlik vazir ustamasini olishi mumkin bo'ladi

Endi vazir ustamasini attestatsiyada umumiy ballning 80 foizini qo‘lga kiritgan o‘qituvchilar olishi mumkin bo‘ladi.

Maktabgacha va maktab ta’limi vazirligi Vazir jamg‘armasidan ustama berish tartibiga o‘zgartirish kiritish bo‘yicha Hukumatga yangi qaror loyihasini kiritganini ma’lum qildi.

Yangi o‘quv yilidan boshlab barcha pedagoglar mazkur ustamani olishga da’vogarlik qilishi mumkin bo‘ladi. Buning uchun esa talabgor pedagoglar malaka toifasi test sinovlarida qatnashishi kerak bo‘ladi. 

Bunda malaka sinovlarining birinchi bosqich natijalariga ko‘ra umumiy ballning kamida 80 foizini qo‘lga kiritgan fan o‘qituvchilari hamda maktabgacha ta’lim tashkilotlari tarbiyachilari orasidan eng yuqori natijani ko‘rsatgan uchta nomzod (hududlar kesimida fan yo‘nalishlari bo‘yicha taqsimlangan har bitta kvota uchun) tanlab olinadi. 

Ya’ni, kelgusi yildan boshlab Vazir jamgʻarmasi uchun oʻtkaziladigan birinchi bosqich (test) sinovlari oʻtkazilmaydi. Buning uchun attestatsiya test natijalari hisobga o‘taveradi.

2026-yilgi Vazir jamg‘armasidan ustama olmoqchi bo‘lgan nomzodlar joriy yilgi malaka sinovlarida faol ishtirok etishlari lozim.

Eslatib o‘tamiz, so‘nggi paytlarda vazir ustamasi saralash bosqichiga doir e’tirozlar ko‘payib borayotgandi.

Shuningdek, hududlardagi ta’lim tizimini isloh qilish bo‘yicha hududiy kengashlar tomonidan tuman (shahar) uchun belgilangan kvotaga nisbatan  nomzodlarni saralash uchun vazirlik (Ishchi guruh)ga taqdim etishda ham shaffoflik mavjud emasdi.