O‘qituvchilarga beriladigan moddiy yordam puliga cheklov o‘rnatildi

Vazirlar Mahkamasining 2025-yil 28-fevraldagi “O‘zbekiston Respublikasi Hukumatining ayrim qarorlariga pedagoglarni attestatsiyadan o‘tkazish, kasbiy sertifikatlash va rag‘batlantirish tizimini takomillashtirishga qaratilgan o‘zgartirish va qo‘shimchalar kiritish to‘g‘risida” 130-son qarori bilan pedagoglarga moddiy yordam puli to‘lash tartibiga o‘zgartirish kiritildi.

Ma’lumki, Vazirlar Mahkamasining 2019-yil 30-sentabrdagi 823-son qarori bilan tasdiqlangan nizomning 33-bandiga ko‘ra umumta’lim muassasalari xodimlariga moddiy yordam xodimning o‘zi yoki yaqin qarindoshi (otasi, onasi, turmush o‘rtog‘i, farzandi) vafot etganda, og‘ir kasallikka chalinganda, xodim tabiiy ofatdan zarar ko‘rganda ko‘rsatiladi.

Bunda moddiy yordam pulining aniq miqdori belgilanmagan bo‘lib, ish beruvchilar yoki kasaba uyushmasi xodimning holatidan kelib chiqib, moddiy yordam puli miqdorini belgilashi mumkin edi.

Endilikda, Vazirlar Mahkamasining 2025-yil 28-fevraldagi 130-son qarori bilan moddiy yordamlarning jami miqdori o‘qituvchining tarif stavkasi miqdorining ikki barobaridan oshirilmasligi belgilab qo‘yildi.

Ya’ni, kalendar yili davomida bir xodimga to‘lanadigan moddiy yordamlarning jami miqdori uning lavozim maoshi (o‘qituvchining tarif stavkasi) miqdorining ikki barobaridan oshirilishiga yo‘l qo‘yilmaydi.