Vazir Hilola Umarova Londonda nima qilyapti?

Maktabgacha va maktab ta’limi vaziri Hilola Umarova Prezident Shavkat Mirziyoyev boshchiligida o‘tkazilgan yig‘ilishdan so‘ng o‘z delegatsiyasi bilan birga Londonda tashkil etilgan butunjahon ta’lim forumida ishtirok etish uchun jo‘nab ketgandi.

Vazir ishtirokidagi mazkur forumda bugungi kunda ta’lim sohasida mavjud yangi tendensiyalar va innovatsion g‘oyalar, ta’limda sun’iy intellektdan foydalanish, turli davlatlar tajribasi asosida ta’limdagi muvaffaqiyatlar  hamda istiqboldagi vazifalar haqida so‘z borgan.

Mazkur forum doirasida esa Hilola Umarova Buyuk Britaniya Parlamenti Davlat kotibi o‘rinbosari — Erta yoshdagi bolalar ta’limi vaziri Stiven Jeyms Morgan bilan uchrashgan.

Uchrashuvda Stiven Morgan maktabgacha ta’lim yo‘nalishida Buyuk Britaniya tajribasi haqida vazirga so‘zlab berdi.

Shuningdek, tomonlar o‘zaro hamkorlik va ikki tomonlama tajriba almashish masalalarini ham muhokama qilishgan. Bundan tashqari, o‘zaro muloqot davomida bolalarni sog‘lom ovqatlantirish yo‘nalishidagi ishlar, istiqboldagi rejalar haqida ham fikr almashildi.

Forumdan so‘ng vazir Umarova O‘zbekistonning Londondagi elchixonasida Buyuk Britaniyada tahsil olayotgan “El-yurt umidi” jamg‘armasi sovrindorlari bilan uchrashdi. 

Uchrashuvda “Prezident iqtidorli farzandlari” tashabbusini amalga oshirish chora-tadbirlari to‘g‘risida”gi Farmoni mazmun-mohiyati haqida gaplashilgan.

Shu bilan birga, Buyuk Britaniyada ta’lim sohasida faoliyat yurituvchi hamkorlar bilan ikki tomonlama uchrashuvlar ham tashkil etilgan. 

Xabar qilinishicha, VSO (Volunteers Services Overseas) tashkiloti bilan ikki tomonlama hamkorlik kelishuvi imzolangan.

Unga ko‘ra, tomonlar O‘zbekistondagi umumta’lim maktablariga xorijdan malakali mutaxassis va volontyorlar, xususan 500 nafardan ortiq angliyalik o‘qituvchilarning jalb qilinishiga kelishilgan.