2024-yilda malaka oshirgan pedagoglarga ustama uchun ball berilishi rasman taqsdiqlandi

Joriy yil 16-fevral kuni ko‘pchilik pedagog xodimlardan malaka oshirganlik uchun pedagoglarga ustama uchun ball berilishi borasida murojaatlar kelib tushgani bois, bu haqda ma’lumot berib, vaziyatga to‘liq sharh bergandik.

Ushbu savolga savolga batafsil javob bergan bo‘lishimizga qaramay, hududlardagi muammolar bartaraf qilinmadi. Aniqrog‘i, mutasaddilar buni tan olishni xohlamadi.

Shundan so‘ng, bu borada Instagram sahifamizda to‘liq ma’lumot berib, videomurojaat orqali vaziyatni to‘liq sharhlab bergandik va Maktabgacha va maktab ta’limi vazirligidan zudlik bilan rasmiy ko‘rsatma berishini so‘ragandik.

Nihoyat, 2025-yil 11-iyun kuni vazirlik tomonidan mazkur masala yuzasidan to‘liq tushuntirish berildi.

Vazirlikning 2025-yil 11-iyuldagi 03-32-1540-sonli ko‘rsatma xatida 2024-yilda malaka oshirish kursidan o‘tib, tegishli sertifikatga ega bo‘lgan pedagoglarning keyingi majburiy malaka oshirish navbati kelgunga qadar sertifikati o‘z kuchida bo‘lishini inobatga olib, ushbu pedagoglarga belgilangan tartib bo‘yicha maksimal ball berilishi maqsadga muvofiqligi qayd etildi.

Quyida vazirlik izohini batafsil keltirib o‘tamiz

“O‘zbekiston Respublikasi Vazirlar Mahkamasining “Umumiy o‘rta ta’lim muassasalarining o‘rnak ko‘rsatgan xodimlarini moddiy rag‘batlantirish tartibini takomillashtirish to‘g‘risida” 2019-yil 30-sentyabrdagi 823-son qarori bilan tasdiqlangan Nizomga 1-ilovada Pedagog, psixolog va kutubxona xodimlarining faoliyatini baholash mezonlari jadvalining 7-pozitsiyasida malaka oshirish kurslaridan o‘tganligi bo‘yicha maksimal 10 ballgacha baholash belgilangan.

Mazkur baholash mezoni jadvalining izoh qismida 7-pozitsiyaga izoh berilgan bo‘lib, bunda agar pedagog xodimga bog‘liq bo‘lmagan holda tegishli malaka oshirish kurslari tashkil etilmagan taqdirda, mazkur ko‘rsatkich bo‘yicha maksimal ball berilishi qat’iy belgilangan.

Hozirgi kunda joylardan pedagog xodimga bog‘liq bo‘lmagan holda tegishli malaka oshirish kurslariga jalb etilmagan bo‘lsa ham, ishchi guruhlar tomonidan asossiz ravishda malaka oshirish kursidan o‘tmagan degan vaj bilan ball qo‘ymaslik holatlari haqida haqli e’tirozlar kelib tushmoqda.

Vazirlar Mahkamasining “Maktabgacha va maktab ta’limi xodimlarining uzluksiz kasbiy rivojlantirish tizimini takomillashtirish to‘g‘risida” 2024-yil 20-dekabrdagi 867-son qaroriga muvofiq yangi tartib joriy etilgan bo‘lib, bunga ko‘ra, 2025-yil 1-yanvardan boshlab maktabgacha va maktab ta’limi tashkilotlarining xodimlari besh yilda bir marotaba (eski tartibga ko‘ra bir yilda bir marotaba) majburiy malaka oshirish kurslariga jalb etilishi hamda har yili tashkilot xodimlarining o‘rtacha 20 foizi malaka oshirish lozimligi belgilab berilgan.

2024-yilda malaka oshirgan pedagog xodim keyingi besh yil ichida ish beruvchi tomonidan majburiy tarzda malaka oshirishga yuborilishi lozim. Ana shu muddatga qadar uning 2024-yilda malaka oshirgani haqidagi sertifikat o‘z kuchida bo‘ladi, belgilangan vaqtda o‘quv kursiga bormagan, shuningdek, uzrli sabablarsiz qatnashmagan hamda belgilangan namunadagi sertifikatni olmagan holatlar bundan mustasno.

Yuqoridagilarni hamda 2024-yilda malaka oshirish kursidan o‘tib, tegishli sertifikatga ega bo‘lgan pedagoglarning keyingi majburiy malaka oshirish navbati kelgunga qadar sertifikati o‘z kuchida bo‘lishini inobatga olib, ushbu pedagoglarga yuqorida qayd etilgan baholash mezonining 7-pozitsiyasi izoh qismida belgilangan tartib bo‘yicha maksimal ball berilishi maqsadga muvofiq”, - deyiladi vazirlikning rasmiy ko‘rsatma xatida.