Sinf rahbarlik uchun talablar o‘zgardi

Hozirgi kunga qadar boshlang‘ich sinflarda o‘rta maxsus ma’lumotli o‘qituvchilarga sinf rahbarlik berilishi uchun hech qanday cheklov mavjud emasdi. Shuningdek, sinf rahbarlik uchun kamida 3 yillik pedagogik ish staj talab qilinardi.

Maktabgacha va maktab ta’limi vazirligining tegishli buyrug‘i bilan mazkur tartibga qo‘shimcha va o‘zgartirishlar kiritildi.

Maktabgacha va maktab ta’limi vazirining 2025-yil 25-avgustdagi 308-son buyrug‘iga 5-ilova “Maktabgacha va maktab ta’limi vazirining ayrim buyruqlariga kiritilayotgan o‘zgartirishlar”ga muvofiq vazirlikning “Umumiy o‘rta ta’lim muassasasi direktorining ma’naviy-ma’rifiy ishlar bo‘yicha o‘rinbosari va sinf rahbarlarining lavozim yo‘riqnomasini tasdiqlash to‘g‘risida” 2023-yil 27-iyundagi 190-son buyrug‘idagi:

• a) 2-band o‘z kuchini yo‘qotdi;

• b) 2-ilovaning 3-bandi ikkinchi xatboshisi quyidagi tahrirda bayon etildi: “oliy pedagogik ma’lumotga ega bo‘lgan”.

Ya’ni, sodda qilib aytganda endilikda o‘rta maxsus ma’lumotli o‘qituvchilarga sinf rahbarlik berilmaydi, sinf rahbari uchun kamida 3 yillik pedagogik ish stajiga ega bo‘lish talabi esa bekor qilindi.

Bunda “Kamida 3 yillik pedagogik ish stajiga ega bo‘lgan”  jumlasi 2-ilovasining 3-bandi ikkinchi xatboshisiga to‘g‘ri keladi, ayrimlar buni birinchi xatboshi deb noto‘g‘ri xulosa qilmoqdalar.

Aslida “Sinf rahbari quyidagi mezonlarga asosan tanlab olinadi:” jumlasi 3-band birinchi xatboshisi hisoblanadi.

Demak, yangi tartibga ko‘ra sinf rahbari quyidagi mezonlarga asosan tanlab olinadi: 

• oliy pedagogik ma’lumotga ega bo‘lgan; 

• maktabda asosiy ishchi sifatida faoliyat olib borayotgan (umumta’lim muassasalarida mehnatni soatbay (shu jumladan o‘rindoshlik) asosda faoliyat olib boruvchi o‘qituvchilarning sinfga rahbarlik qilishiga yo‘l qo‘yilmaydi); 

• boshqaruvchanlik qobiliyatiga ega bo‘lgan; 

• o‘quvchilar bilan ishlash jarayonida mas’uliyat bilan yondasha oladigan;

• boshlang‘ich sinflarda sinf rahbarligi boshlang‘ich sinfga biriktirilgan o‘qituvchilarga yuklatiladi.