Magistraturani tamomlagan o‘qituvchiga qanday imtiyoz yoki ustamalar bor?

22:00 / 21.02.2024 13.51k

Magistr darajasiga ega pedagoglarga nisbatan qonunchilikda ayrim imtiyozlar amal qiladi, lekin buning uchun maxsus ustamalar belgilanmagan.

Magistr darajasiga ega mutaxassislarga to‘g‘ridan-to‘g‘ri ikkinchi malaka toifasi beriladi

Vazirlar Mahkamasining 2021-yil 17-sentabrdagi 572-son qarori bilan tasdiqlangan “Maktabgacha, umumiy o‘rta, o‘rta maxsus, professional va maktabdan tashqari ta’lim tashkilotlari pedagog kadrlarini attestatsiyadan o‘tkazish tartibi to‘g‘risida”gi nizomning 10-band, 2-xatboshiga ko‘ra magistr darajasiga ega mutaxassislarga — ikkinchi malaka toifasi (katta o‘qituvchi lavozimi) beriladi.

Ushbu imtiyozni qo‘lga kiritish uchun pedagog xodim magistratura diplomini asos qilgan holda to‘g‘ridan-to‘g‘ri (attestatsiyadan o‘tkazilmasdan) ikkinchi malaka toifasi olish uchun pedkadr.uzedu.uz platformasi orqali murojaat yuborib, ikkinchi toifa uchun sertifikat olishi lozim.

Ma’lumot uchun, magistr darajasiga ega bo‘lgan mutaxassislarga to‘g‘ridan-to‘g‘ri (attestatsiyadan o‘tkazilmasdan) berilgan ikkinchi malaka toifa va sertifikatning amal qilish mudddati besh yildan so‘ng tugaydi. Besh yillik muddatdan so‘ng magistr darajasi uchun to‘g‘ridan-to‘g‘ri (attestatsiyadan o‘tkazilmasdan) ikkinchi toifa berilgan pedagoglar belgilangan tartibda navbatdagi majburiy attestatsiyaga jalb qilinadi.

Magistr darajasiga ega mutaxassislar kasbiy sertifikatlash test sinovlariga jalb qilinmaydi

Vazirlar Mahkamasining 2024-yil 12-fevral kungi 87-sonli qarori bilan tasdiqlangan “Davlat umumiy o‘rta ta’lim tashkilotlari pedagog kadrlarini kasbiy sertifikatlash bo‘yicha davlat xizmatlarini ko‘rsatishning ma’muriy reglamenti”ga ko‘ra 2023/2024-o‘quv yilidan boshlab pedagogik kasbga birinchi marta ishga qabul qilinadigan oliy ma’lumotli talabgorlar stajor-o‘qituvchi sifatida faoliyat yuritadi va ular ishga qabul qilingan vaqtdan boshlab 1 yil muddat davomida kasbiy sertifikatga ega bo‘lishi talab etiladi.

2024/2025-o‘quv yilidan boshlab esa bosqichma-bosqich maktablarda faoliyat yuritib kelayotgan, tegishli malaka toifasiga ega bo‘lmagan pedagog kadrlarni kasbiy sertifikatlash test sinovlariga jalb qilinadi. Bunda magistr darajasiga ega mutaxassislar kasbiy sertifikatlash test sinovlariga jalb qilinmaydi.