Toshkent shahar MMTB bir maktabda 54 ta jinoyat sodir etilgani haqidagi xabarni asossiz deya bayonot berdi

Bundan avval Toshkent shahar hokimi o‘rinbosari Durdona Rahimova Toshkentdagi maktablarning birida 17 ta, yana birida esa 54 ta jinoyat sodir etilgani haqida aytgandi.

Holat yuzasidan Toshkent shahar maktabgacha va maktab ta’limi boshqarmasi raddiya berdi. Boshqarmaning aytishicha, bu mazmundagi ma’lumotlar haqiqatga to‘g‘ri kelmaydi.

“Yaqinda poytaxtimizdagi Milliy kino san’ati saroyida “Bolalar ta’lim va tarbiyasiga barchamiz mas’ulmiz!” mavzusida Toshkent shahar hokimligi, shahar prokuraturasi, Maktabgacha va maktab ta’limi boshqarmasi, Milliy gvardiya, Ichki ishlar bosh boshqarmasi mas’ullari ishtirokida ochiq muloqot o‘tkazildi.

Unda turli idoralar mas’ullari poytaxt umumta’lim maktablarida ta’lim-tarbiya sifatini yaxshilash, jumladan, o‘quvchi-yoshlar o‘rtasida huquqbuzarliklar va jinoyatchilikning oldini olish borasida o‘z munosabatlarini bildirishdi. O‘z navbatida ayrim statistik ma’lumotlar aytib o‘tildi. 

Ammo yuqorida tilga olingan raqam va ma’lumotlar mutlaqo asossiz ekanligi, poytaxt umumta’lim maktablarining birortasida bunaqa jinoyat va huquqbuzarliklar qayd etilmaganligini bildiramiz”, - deyiladi Toshkent shahar MMTB Matbuot xizmati rasmiy bayonotida.