O‘qituvchi ikkita maktabda ishlasa, ikkala maktabdan ham toifa va sertifikat uchun ustama oladimi?

Savol

Agar o‘qituvchida toifa va ustama beruvchi sertifikat bo‘lsa, bir maktabda asosiy o‘qituvchi bo‘lib ishlab, boshqa maktabdan yana qo‘shimcha soatbay dars olsa, uning oylik maoshiga toifa va sertifikat ustamasi qo‘shib to‘lanadimi?

Javob

Vazirlar Mahkamasining 2005-yil 21-dekabrdagi 275-son qarori bilan tasdiqlangan ‘‘Xalq ta’limi xodimlari mehnatiga haq to‘lash to‘g‘risida’’gi nizomga ko‘ra pedagog xodimlarning lavozim maoshlari malaka toifasi uchun belgilangan bazaviy tarif stavkalari asosida shakllantiriladi. 

Bazaviy tarif stavkasi Yagona tarif setkasi bo‘yicha tarif stavkasini hamda qonunchilikda belgilangan tarif stavkasiga doimiy ustamalarni, shuningdek pedagog va rahbar xodimlarning ayrim toifalari ish haqiga qo‘shilgan kompensatsiya to‘lovlarini o‘z ichiga oladi.

Shu sababli, malaka toifasiga ega bo‘lgan o‘qituvchi boshqa ta’lim muassasasida ham soatbay asosida ishlagan taqdirda malaka toifasi uchun ham qo‘shimcha ish haqi hisoblanadi.

O‘qituvchida unga ustama berishga asos bo‘luvchi sertifikat bo‘lsa-chi?

Pedagog xodimlarga ustama belgilashda qo‘llaniladigan milliy va xalqaro tan olingan sertifikatlar ro‘yxati Oliy ta’lim, fan va innovatsiyalar vazirligining 2024-yil 4-apreldagi 4-q/q-son va Maktabgacha va maktab ta’limi vazirligining 2024-yil 2-apreldagi 3-mh-son qarori [tahr. 04.04.2024] bilan tasdiqlangan.

Bunda umumiy o‘rta ta’lim tizimida faoliyat yuritayotgan o‘qituvchilarga (shu jumladan, soatbay, o‘rindosh, stajyor o‘qituvchi, direktor va direktor o‘rinbosarlari) o‘zi dars beradigan fani bo‘yicha sertifikatga ega pedagog xodimlarga har oylik qo‘shimcha ustama to‘lash nazarda tutilgan.

Ya’ni, tegishli sertifikatga ega bo‘lgan o‘qituvchiga u boshqa bir maktabda soatbay asosida dars bergan taqdirda ham ustamalar to‘lab beriladi.

Xulosa shuki, toifa va ustama beruvchi sertifikatga ega bo‘lgan o‘qituvchi bir maktabda asosiy o‘qituvchi bo‘lib ishlab, boshqa maktabdan yana qo‘shimcha soatbay dars olgan taqdirda, uning oylik maoshiga toifa va sertifikat uchun to‘lovlar amalga oshiriladi.

Qo‘shimcha ma’lumot: ‘‘Xalq ta’limi xodimlari mehnatiga haq to‘lash to‘g‘risida’’gi nizomning 21-bandiga ko‘ra pedagog xodimlarga qonunchilik hujjatlarida belgilangan ustamalar, shu jumladan mavjud sertifikatlari uchun to‘lanadigan ustamalar, tarifikatsiya ro‘yxatida ajratilgan dars soatlariga (o‘qituvchining tarif stavkasiga) mutanosib ravishda to‘lab beriladi.

Ya’ni, agar o‘qituvchi boshqa bir o‘qituvchining darslarini vaqtincha o‘tayotgan bo‘lsa, ularning mavjud sertifikatlari uchun ustama to‘lanmasligi mumkin.