Yangi o‘quv yilidan o‘rta maxsus ma’lumotli o‘qituvchilar ham attestatsiyaga jalb etiladi

Xabaringiz bor, Vazirlar Mahkamasining 2025-yil 28-fevraldagi 130-son qarori bilan pedagoglarni attestatsiyadan o‘tkazish tartibi takomillashtirildi.

Yangi tartibga ko‘ra, endilikda majburiy attestatsiyaga ta’lim tashkilotlarining barcha pedagog kadrlari jalb etiladi. Shu qatori o‘rta maxsus ma’lumotli o‘qituvchilar ham.

Yangi, 2025/2026 o‘quv yilidan boshlab oliy ma’lumotga ega bo‘lmagan pedagoglarni belgilangan tartibda attestatsiyadan o‘tkazish jarayonlari boshlanadi.

Attestatsiya test sinovlariga jalb qilingan oliy ma’lumotga ega bo‘lmagan pedagog kadrlarga malaka toifalari berilmaydi, bunda ular lavozimini saqlab qolishlari kerak bo‘ladi.

Oliy ma’lumotga ega bo‘lmagan pedagog kadrlar:

• 55 ball va undan yuqori ko‘rsatkichga ega bo‘lsa — attestatsiyadan o‘tgan, lavozimi saqlangan;

• 55 balldan kam ko‘rsatkichga ega bo‘lsa — attestatsiyadan o‘tmagan, o‘qituvchi lavozimiga muvofiq emas, deb hisoblanadi.

Oliy ma’lumotga ega bo‘lmagan pedagog kadrlar navbatdagi majburiy attestatsiyadan o‘ta olmagan taqdirda, ish beruvchi xodimning malakasi yetarli bo‘lmaganligi sababli u bilan tuzilgan mehnat shartnomasini mehnat to‘g‘risidagi qonunchilik hujjatlarida belgilangan tartibda bekor qilish huquqiga ega bo‘ladi.

Ish beruvchi mehnat shartnomasini bekor qilmagan taqdirda, navbatdagi majburiy attestatsiyadan o‘ta olmagan oliy ma’lumotga ega bo‘lmagan pedagog kadr navbatdan tashqari attestatsiyaga ko‘pi bilan ketma-ket ikki marta jalb etiladi. 

Bunda ikki martadan birortasida ham navbatdan tashqari attestatsiyadan o‘ta olmagan yoki uzrli sababsiz (kasallikka chalinishi oqibatida mehnatga qobiliyatsizlik davrida hamda davlat yoki jamoat vazifalarini bajarganligidan tashqari hollarda) attestatsiyada ishtirok etmagan pedagog kadr bilan tuzilgan mehnat shartnomasi mehnat to‘g‘risidagi qonunchilik hujjatlarida belgilangan tartibda xodimning malakasi yetarli bo‘lmaganligi sababli bekor qilinadi.

Attestatsiyadan o‘ta olmagan oliy ma’lumotga ega bo‘lmagan pedagog kadrlarni ketma-ket ikki marta navbatdan tashqari attestatsiyaga jalb etishga pedagog kadr faoliyat ko‘rsatayotgan ta’lim tashkilotining rahbari shaxsan javobgar hisoblanadi.

Attestatsiyadan o‘ta olmaganligi sababli mehnat to‘g‘risidagi qonunchilik hujjatlarida belgilangan tartibda pedagoglarning mehnat shartnomasi (xodimning malakasi yetarli bo‘lmaganligi sababli) bekor qilingan taqdirda, pedagog kadr faqat o‘z xohishi bilan navbatdan tashqari Kasbiy sertifikatlash sinovida ishtirok etib, sertifikatni qo‘lga kiritgan holdagina, yana pedagog sifatida ishga qabul qilinishi mumkin bo‘ladi.