Sanitariya talablari buzilgani uchun ayrim xususiy bog‘chalar yopildi

Sirdaryo viloyatidagi 398 ta xususiy bog‘chada o‘tkazilgan sanitariya tekshiruvlarida qator qoidabuzarliklar aniqlandi. Bu haqda UzA xabar berdi.

Tekshiruvlar davomida ko‘plab muassasalarda bolalarga yaratilgan shart-sharoitlar sanitariya talablariga javob bermasligi aniqlandi. Xususan, 60 ta bog‘chaning oshxonasi ta’mirtalab holda ekani, suv ta’minotida uzilishlar borligi, qo‘l yuvish uskunalari  yetarli darajada jihozlanmagani ma’lum bo‘ldi. 

Shuningdek, ayrim muassasalarda xodimlar va bolalar belgilangan muddatlarda tibbiy ko‘rikdan o‘tmagan, yotoq choyshablari eskirgan, ayrim xonalar va eshiklar ta’mirtalabligi ham qayd etilgan.

Aniqlangan kamchiliklar asosida bir qator bog‘chalar faoliyati vaqtincha to‘xtatildi. Bu chora, mas’ullarni kamchiliklarni bartaraf etishga majbur qilish hamda bolalar uchun sog‘lom va xavfsiz muhit yaratishni ta’minlash maqsadida ko‘rilgan.

‘‘Tekshiruv natijalariga ko‘ra, sanitariya norma va me’yorlarini buzgan 329 nafar mas’ul shaxsga nisbatan sud organlari tomonidan umumiy 333 million 480 ming so‘m miqdorida ma’muriy jarimalar qo‘llanildi’’, – deydi Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasining Sirdaryo viloyati boshqarmasi boshlig‘i Jo‘rabek Hasanov. 

Ma’lum qilinishicha, Sanitariya-epidemiologik osoyishtalik va jamoat salomatligi boshqarmasi, shahar va tuman bo‘limlari mutaxassislari tomonidan ilgari ham xususiy bog‘cha rahbarlari uchun sanitariya-gigiyena talablari bo‘yicha o‘quv-seminarlar o‘tkazilgan. Ammo, shunga qaramay, ayrim tashkilotlarda hali ham talablarni buzish holatlari saqlanib qolgan.

Mutasaddilarning ta’kidlashicha, sanitariya qoidalari va gigiyena talablariga rioya etish barcha ta’lim muassasalari uchun, ularning mulkiy shaklidan qat’i nazar, majburiy hisoblanadi.

Hozirda aniqlangan kamchiliklarni bartaraf etish bo‘yicha maxsus ishchi guruhlar tashkil etilgan bo‘lib, nazorat ishlari viloyat miqyosida davom ettirilmoqda.