Maktablarda yozgi ta’til qisqarmoqdami?

Ijtimoiy tarmoqlarda O‘zbekiston maktablarida o‘quvchilarga beriladigan 3 oylik yozgi ta’tilni 1,5 oyga qisqartirish taklifi ko‘rib chiqilayotgani haqida xabarlar tarqaldi.

Xalqtaliminfo.uz ushbu xabarlar qanchalik asosli ekanligini o‘rganish maqsadida Maktabgacha va maktab ta’limi vazirligi bilan bog‘landi.

Vazirlikning ma’lum qilishicha, hozirgi kunda maktablarda yozgi ta’tilni qisqartirish rejalashtirilmagan bo‘lib, ijtimoiy tarmoqlardagi xabarlar hech qanday asosga ega emas.

Eslatib o‘tamiz, Vazirlar Mahkamasining 2017-yil 15-martdagi 140-son qarori bilan tasdiqlangan "Umumiy o‘rta ta’lim to‘g‘risida"gi nizomga ko‘ra o‘quv yilining davomiyligi — 34 hafta (I sinflar uchun 33 hafta)ni tashkil qiladi.

O‘quv yili davomidagi ta’tillarning muddatlari esa quyidagicha belgilangan:

• kuzgi ta’til — 4-noyabrdan boshlab 6 kalendar kun;

• qishki ta’til — 28-dekabrdan boshlab 14 kalendar kun;

• bahorgi ta’til — 21-martdan boshlab 7 kalendar kun;

• yozgi ta’til — oxirgi bosqichli nazorat sinovi o‘tkazilgan kundan (bosqichli nazorat o‘tkazilmaydigan sinflar uchun o‘quv yili tugagan kundan keyingi kundan) boshlab 1-sentabrgacha.