Ba’zi platformalarda bolalarni zararli kontentdan himoya qilish choralari kuchaytiriladi

Meta kompaniyasi bolalar va o‘smirlarning xavfsizlik choralarini kuchaytirmoqda. Kompaniya Instagram tarmog‘ida 16 yoshga to‘lmagan yoshlarning ota-onalar ruxsatisiz ilovaning “Jonli efir” funksiyasidan foydalanishni taqiqlamoqchi.

Bundan tashqari, Meta 18 yoshgacha bo‘lgan o‘smirlar uchun xavfsizlik choralarini Facebook va Messenger platformalariga ham kengaytirmoqda.

Shuningdek, o‘smirlar, kattalar ruxsatisiz shaxsiy xabarlarida noqonuniy kontent bo‘lgan rasmlarni xiralashtiradigan funksiyani ham o‘chira olmaydi. 

Meta kompaniyasining ta’kidlashicha, butun dunyo bo‘ylab 18 yoshgacha bo‘lgan 54 million o‘smir Instagram akkauntlaridan foydalangan. Shu o‘rinda, 13 yoshdan 15 yoshgacha bo‘lganlarning 90 foizdan ortig‘i o‘zlarining standart cheklovlarini saqlab qolgan.

Mazkur yangilik Buyuk Britaniya "Onlayn-xavfsizlik to‘g‘risida"gi qonunni joriy etayotgani munosabati bilan e’lon qilindi. 

Ma’lumot uchun: Buyuk Britaniyada joriy qilingan Qonunga ko‘ra joriy yil mart oyidan boshlab Facebook, Google va X’dan tortib Reddit va OnlyFans’gacha bo‘lgan 100 000 dan ortiq xizmatlarni qamrab olgan har bir veb-sayt va ilova Buyuk Britaniya qonunchiligi doirasida bolalarga nisbatan jinsiy zo‘ravonlik, firibgarlik va terrorizm kabi noqonuniy kontentning paydo bo‘lishini to‘xtatish yoki agar u tarmoqqa tushsa, uni olib tashlash choralarini ko‘rishi lozim.

Qonun, shuningdek, bolalarni zarar yetkazishdan himoya qilish qoidalarini o‘z ichiga oladi va texnologik platformalardan voyaga yetmaganlarni o‘z joniga qasd qilish va o‘z-o‘ziga zarar yetkazish kabi zararli kontentdan himoya qilishni talab qiladi.