Bu yil rahbar xodimlarga dars berilmaydimi?

Savol

“Rayono” boshlig‘imiz bu yil birorta ham direktor, “zavuch” va “zamdirektor”ga dars berilmasligi, buni shaxsan o‘zi nazorat qilishi haqida ko‘rsatma beryapti. 

Uning bu talabi qanchalik to‘g‘ri? Bu haqda qonunchilikda aynan nima deyilgan?

Javob

Maktablardagi dars taqsimoti “Umumta’lim muassasalarida sinflarni komplektlash hamda tarifikatsiya ro‘yxatlarini shakllantirish tartibi to‘g‘risida”gi nizomga (ro‘yxat raqami 3271) 15-bandiga asosan amalga oshiriladi.

Nizomning 15-bandidagi ko‘rsatgichlarga muvofiq dars soatlarini taqsimlashda o‘qituvchining erishgan yutuqlari (bunda o‘quvchilarining olimpiadalarda olgan o‘rinlari, chet tili bo‘yicha olingan sertifikatlar, ko‘rik tanlovlarda ishtiroki va boshqalar) hamda malaka toifasi, ma’lumoti kabilar inobatga olinishi lozim.

Ketma-ketlikning eng oxirida oliy ma’lumotli o‘qituvchilar bilan ta’minlanguniga qadar umumta’lim muassasasining tegishli mutaxassisligi bo‘yicha rahbar xodimlariga dars berilishi mumkinligi ko‘rsatilgan.

Nizomning 16-bandida ko‘rsatkichlar ketma-ketlik asosida ustunlikka ega bo‘lgan o‘qituvchilarga dars soatlarining maksimal miqdorlari belgilanishi tavsiya etilgan.

Dars soatlarini taqsimlashda maktabda shu fan bo‘yicha mavjud dars soatlariga, shu fandan dars beruvchi o‘qituvchilar soniga, ularning ko‘rsatkichlariga qaraladi.

Jami dars soatlari o‘qituvchilar o‘rtasida taqsimlab bo‘lingach, rahbar xodimlarga asosiy lavozimning bir haftada 10 soatgacha hajmda o‘qituvchi lavozimi bilan qo‘shib olib borilishiga (o‘quv yuklamasi yuritilishiga) yo‘l qo‘yiladi.

Demak, bundan shunday xulosa qilish mumkinki, rahbar xodimlarga dars berilmasin, degan taqiqlovchi qoida yo‘q.

Ya’ni, ta’lim muassasasi oliy ma’lumotli o‘qituvchilar bilan ta’minlanguniga qadar umumta’lim muassasasining tegishli mutaxassisligi bo‘yicha rahbar xodimlariga dars berilishi mumkin.

Yuqoridagi vaziyatda maktabgacha va maktab ta’limi bo‘limi boshlig‘ining ko‘rsatmasi mutlaqo noto‘g‘ri.