Maktabda obuna va majburiy mehnat aniqlansa, direktor ishdan ketadi – Sirdaryo hokimi

Sirdaryo viloyati hokimi Erkinjon Turdimov ta’lim tizimidagi majburiy mehnat va obuna masalalariga keskin munosabat bildirdi. Hokimning ta’kidlashicha, maktablarda bunday holatlarga mutlaqo yo‘l qo‘yilmasligi kerak. 

Hokim endilikda shu kabi holatlarga yo‘l qo‘ygan direktorlar ishdan olinishini aytib, majburiy mehnat va gazeta obunasiga rozi bo‘lgan o‘qituvchilarning o‘zi ham direktor bilan birga ishdan ketishini aytdi.

“Majburiy mehnat mutlaqo mumkin emas. O‘qituvchilarga mana shu shuning uchun ham aytyapman, ertaga fursatdan foydalanib bir narsani aytmoqchimanki, bironta maktabda agar majburiy mehnat bo‘ladigan bo‘lsa, avtomatik tarzda direktor ishdan olinishi kerak.

Shu majburiy mehnatga chiqqan odamni ham ishdan olish kerak. Chunki, uni majburlab chiqargan bo‘lsa, hech qanaqa huquqi yo‘q bo‘lsa, chalasavod bo‘lsa, ko‘r mulla bo‘ladigan bo‘lsa-yu, uni chiq desa chiqib ketaversa, u qanaqa o‘qituvchi bo‘ladi?

Shuning uchun har bitta holatga jiddiy e’tibor qaratish kerak. Mana ikkinchi masala, meni qiynaydigan narsa – obuna masalasi. Birorta o‘qituvchi obuna bo‘ladigan bo‘lsa, o‘sha maktab direktorini ishdan olaman. O‘qituvchi! Birorta gazetaga! Hamma bilib olsin. O‘sha paytida ishdan olaman.

Obuna bo‘ladigan bo‘lsangiz, o‘zingiz obuna bo‘ling, bitta gazetaga. Ana “zamdirektoringiz” bor, to‘rttami, beshtadan. Ana “zavxozingiz” bor, o‘qituvchiga teginmang”, - degan hokim.