O‘qituvchilardan yashash xonadonini suratga olib yuborish talab qilinmoqda

Ijtimoiy tarmoqlarda Sirdaryo viloyatida o‘tkazilayotgan “Eng namunali xonadon” tanlovi yuzasidan turli xabarlar tarqalmoqda. Xususan, o‘qituvchilardan tanlovda ishtirok etish uchun o‘z uylarining turli qismlarini suratga olib yuborish talab qilinayotgani aytilmoqda.

Jurnalist Ibrat Safo ushbu holatni tanqid qilib, tanlov uchun ishtirokchilar topishda qiyinchilik yuzaga kelgani sababli navbatdagi vazifa yana maktablar zimmasiga yuklangani haqida yozdi.

Uning fikricha, bu kabi topshiriqlar o‘qituvchilarning shaxsiy hayotiga daxldor bo‘lib, pedagoglarni o‘z xonadonlarini begona shaxslarga namoyish etishga majbur qilish to‘g‘ri emas.

“O‘qituvchilar bu oddiy mehnatkash xodim bo‘lsa, ularni shaxsiy uyi, hojatxonasi yoki hovlisini rasmga olib hisobot berishga majburlash shaxsiy hayot daxlsizligiga zid. Bunaqa ahmoqgarchiliklar o‘rniga o‘qituvchilarning oylik maoshi va ijtimoiy himoyasini kuchaytirishga e’tibor qaratishsa nur ustiga a’lo nur bo‘lardi. 

Lekin jamoatchilik oldida haqiqiy hisobdor bo‘lgan amaldorlar — hokimlar, vazirlar va agentlik rahbarlari o‘rtasida shunday tanlov o‘tkazishsa arziydi. Ana ular daromadlari-yu, mol-mulklarini rasmga tushirib, kerak bo‘lsa video qilib bo‘lsa ham xalqqa hisob bersin”, - deydi Laziz Hamidov.

Bloger, pedagog Isroil Tillaboyev esa bunday tadbirlarni tashkillash uchun yana o‘qituvchilardan foydalanilganini tanqid qildi.

“Tanlov tashkilotchilari boshlashga boshlab qo‘yib, ishtirokchilarni topishga qiynalishmoqda shekilli. Chunki kimga zarur bunday tanlovga qatnashish,  ayniqsa uyushmagan mahalla aholisiga. Shunda “pojar” payti o‘t o‘chiruvchilar yodga tushgandek yana kimnidir hayoliga maktab esga tushgan. To‘g‘rida, hamma mahallada o‘qituvchilar bor-ku! 

Darhol namunaviy ko‘rsatma berilibdi va tanlovda qatnashishga topshiriq berilibdi. Naqadar iltifot, oliyjanoblik! Hali har bir maktab ro‘yxati yuritilayotgan bo‘lsa ham ajablanmayman. Tinib-tinchimagan tanlovchilar nimalarni o‘ylab topishmaydi, nimalarga majburlashmaydi, qo‘yib bersang”, - deya post qoldirgan Isroil Tillaboyev.

Bohsqa pedagoglarning yozishicha, bunday holat boshqa hududlarda ham kuzatilmoqda. Hozircha holat yuzasidan Sirdaryo viloyati Maktabgacha va maktab ta’limi boshqarmasi yoki tanlov tashkilotchilari tomonidan rasmiy izoh berilmadi.