B2 sertifikati muammosi yana kun tartibida

Maktabgacha va maktab ta’limi vazirligi ayni mavzu muhokamasiga mehnat huquqi sohasi bo‘yicha mutasaddi tashkilotlarni vazirlikka taklif qilib, masalani muhokama qildi.

Unda Kambag‘allikni qisqartirish va bandlik vazirligidan Laziz Qarshiyev, Adliya vazirligi vakillari, O‘zbekiston ta’lim va fan xodimlari kasaba uyushmasi Respublika Kengashidan Lazokat Turikova hamda “Yuristkadr” advokatlik firmasi rahbari Saidali Muxtoraliyevlar ishtirok etdi.

Uchrashuv Maktabgacha va maktab ta’limi vazirining birinchi o‘rinbosari Sherzod Karimov raisligida o‘tkazilgan. Bu haqda O‘zbekiston ta’lim va fan xodimlari kasaba uyushmasi Respublika Kengashi ma’lum qildi.

Ma’lumki, xorijiy til o‘qituvchilari uchun majburiy B2 darajadagi milliy yoki unga tenglashtirilgan xalqaro sertifikat talabi ta’lim tizimidagi eng dolzarb masalalardan biri bo‘lib qolmoqda. Yaqinda O‘zbekiston ta’lim va fan xodimlari kasaba uyushmasi Respublika kengashining aralashuvi bilan sertifikat talabi muddati uzaytirilgandi.

O‘zbekiston ta’lim va fan xodimlari kasaba uyushmasi Respublika kengashining O‘zbekiston Respublikasi Maktabgacha va maktab ta’limi vazirligiga yuborgan rasmiy xati natijasida, B2 sertifikatiga ega bo‘lmaganligi sababli mehnat shartnomasi bekor qilinishi xavfi ostida qolgan 20 mingdan ziyod pedagogning huquqlari himoya qilinib, joylardagi keskinlik bartaraf etilgan.

Biroq, ushbu pedagoglarga 2026-yil 1-yanvariga qadar sertifikat olish uchun muhlat berilishi ortidan yangi savollar, murojaatlar va muammolar kelib chiqa boshladi. Muhlatning cheklangani va sertifikat olish jarayonlari bilan bog‘liq qator omillar o‘qituvchilar orasida yana xavotir uyg‘otgan.

Maktabgacha va maktab ta’limi vazirligida bo‘lib o‘tgan uchrashuvda tomonlar masalaning yechimi yuzasidan o‘zlarining dastlabki takliflarini, joylardagi haqiqiy muammolarni va ularning yechimlari bo‘yicha fikrlarini o‘rtaga tashladi.

O‘z navbatida, Kasaba uyushmasi Respublika kengashi vakillari o‘qituvchilarning manfaatlaridan kelib chiqqan holda qat’iy pozitsiyani bildirgan. Xususan, muammoni vaqtinchalik yoki qisman hal etish o‘rniga, Vazirlar Mahkamasining tegishli qaroriga aniq va to‘g‘ridan-to‘g‘ri qo‘shimcha o‘zgartirish kiritish, ya’ni masalani tubdan hal qiladigan aniq norma qabul qilish maqsadga muvofiq ekanligi ta’kidlandi.

“Xo‘sh, berilgan imkoniyatdan foydalanmagan va uzaytirilgan muddat ichida ham sertifikat olmagan chet tili o‘qituvchilari ishdan bo‘shatiladimi yoki yo‘qmi? Bir tomonda Hukumat qarorining ijrosi turibdi, ikkinchi tomonda 10.000 ga yaqin o‘qituvchilar. 

Adliya vazirligi, Bandlik vazirligi, Ta’lim va fan xodimlari kasaba uyushmasi kengashi vakillari, shu jumladan, biz ham o‘z takliflarimizni berdik. Masala qariyb 2 soat qizg‘in muhokama qilindi.  Kelayotgan haftada yana bir bor uchrashib, yakuniy fikrga keladigan bo‘ldik. 

Shu o‘rinda, vazirlik bu kabi ommaviy mehnat munosabatlarini shoshmasdan, mutasaddi idoralar va  mustaqil ekspertlar bilan kengashib hal qilayotgani e’tirofga loyiq”, - deydi “Yuristkadr” advokatlik firmasi rahbari Saidali Muxtoraliyev.

Uchrashuv yakunida tomonlar ushbu masala bo‘yicha doimiy muloqotni davom ettirishga va tez kunlarda barchani qanoatlantiradigan aniq huquqiy yechimni ishlab chiqishga kelishib oldi.