Balki o‘qituvchilarga ijtimoiy-psixologik xizmat ko‘rsatish kerakdir?

11:40 / 06.03.2024 2.30k

Deyarli har kuni o‘quvchini kaltaklayotgan pedagog xodimlar haqidagi videolar ijtimoiy tarmoqlarda tarqalib, keng muhokamalarga sabab bo‘lmoqda.

Hududiy maktabgacha va maktab taʼlimi boshqarmalari rasmiy sahifalarini kuzatsangiz, deyarli har uchta xabardan so‘ng qaysidir maktabdagi ko‘ngilsiz holat bo‘yicha rasmiy bayonot berilganiga guvoh bo‘lishingiz mumkin.

Bu kabi holatlar bo‘yicha Oliy Majlis Qonunchilik palatasi Spikeri o‘rinbosari Alisher Qodirov ham o‘zining telegram sahifasida Maktabgacha va maktab taʼlimi vazirligiga murojaat qilib, pedagogik qobiliyati yo‘q, bilimsiz va betoqat xodimlaridan mutlaqo voz kechish kerakligi haqida yozgandi.

Lekin biz muammoning asl ildizi bilan ham kurashyapmizmi?

Biz bu kabi holatlarning kelib chiqish sababini ham o‘rganamizmi? Taʼlim muassasalaridagi stress darajasini o‘rganib, buning sabablarini tahlil qilib ko‘rdikmi?

O‘zbekistonda o‘qituvchilarga bepul ijtimoiy-psixologik xizmat ko‘rsatadigan klinikalar mavjudmi? Bunday klinikalar ochishga kimdir harakat qilib ko‘rganmi?

Xo‘p, asabiy bo‘lib qolgan, betoqat o‘qituvchilarni ishdan bo‘shatdik ham deylik, lekin vaziyat o‘zgaradimi? Boshqa o‘qituvchilar bunday holga tushmasligiga kimdir kafolat beradimi? Kuni stress bilan o‘tadigan pedagoglarga qachon psixologik xizmat ko‘rsatishni yo‘lga qo‘yamiz o‘zi?

Menimcha hukumat ham, vazirlik ham, deputatlar ham, avval mana shu savollarga javob topishi kerak. Jazolash bilan vaziyatni hech qachon o‘nglay olmaymiz.

Qaysidir holat bo‘yicha rasmiy bayonot berildi degani, bu masala to‘liq yopildi degani emas. Biz ko‘proq muammoning ildizi bilan shug‘ullanishimiz kerak. Jazolash esa vaqtinchalik chora xolos.

Ha aytgancha, rivojlangan mamlakatlarda xodim shunday holatga tushsa unga kasallik varaqasi ochilar ekan. Bizning amaliyotda esa xodimni ishdan bo‘shatib qutilishadi. Chunki bizning masʼullar sabablar bilan emas, oqibatlar bilan kurashishga o‘rganib qolgan ko‘rinadi.