Maktablarning bo‘sh yerlarida xususiy bog‘cha qurishga ruxsat berildi

Xabaringiz bor, Prezident Shavkat Mirziyoyev joriy yilning 4-sentyabr kuni maktabgacha ta’limni rivojlantirish, iqtidorli yoshlar bilan ishlash tizimini takomillashtirish bo‘yicha takliflar taqdimoti bilan tanishgandi.

Mazkur taqdimotda maktabgacha ta’lim qamrovini kengaytirish maqsadida maktablarning bo‘sh yerlarida davlat-xususiy sheriklik asosida bog‘cha qurishga ruxsat berish taklifi ilgari surilgandi.

Maktabgacha va maktab ta’limi vazirligining xabar berishicha, O‘zbekiston Respublikasi Prezidentining “Maktabgacha ta’lim sifati va samaradorligini yanada oshirish bo‘yicha qo‘shimcha chora-tadbirlar to‘g‘risida”gi Farmoni imzolandi.

Farmon bilan 2025-yil 1-yanvardan boshlab qamrov darajasi past bo‘lgan davlat umumiy o‘rta ta’lim muassasalarining bo‘sh turgan yer uchastkalarida davlat-xususiy sheriklik asosida nodavlat maktabgacha ta’lim tashkilotlari faoliyatini yo‘lga qo‘yishga ruxsat etildi.

Shuningdek, davlat oliy ta’lim muassasalariga ularning bo‘sh turgan yer uchastkalarida maktabgacha ta’lim tashkilotlari faoliyatini yo‘lga qo‘yishga ham ruxsat etildi.