Attestatsiyada 86 va undan yuqori ball to‘plagan o‘qituvchilarga 70 foizlik ustama berilishi mumkin

Maktabgacha va maktab ta’limi vazirligi Pedagog kadrlarga malaka toifalarini berish jarayonini tashkil etish boshqarmasi boshlig‘i Sardor Raximboyev “Xalq ta’lim Info” bilan bo‘lib o‘tgan suhbatda xalqaro standartlar asosida malaka sertifikatiga ega bo‘lgan pedagoglarga 70 foizlik ustama berish masalasiga ham alohida to‘xtalib o‘tdi.

Xalqaro standartlar asosida malaka sertifikatiga ega bo‘lgan pedagoglarga 70 foizlik ustama berish yo‘lga qo‘yilmoqda. Hozirda xalqaro tashkilotlar bilan hamkorlik boshlangan. Tizim xalqaro akkreditatsiyadan o‘tganidan keyin ushbu talablar asosida 86 ballik natija bilan malaka sertifikatini olgan pedagoglar 70 foizlik ustama olishlari mumkin bo‘ladi.

— Xalqaro standartlar asosida malaka sertifikatiga ega bo‘lgan pedagoglarga 70 foizlik ustama qanday to‘lanadi? Aytaylik, o‘qituvchi shu attestatsiyadan o‘tsa, 70 foizlik ustama qaysi oylik maoshdan kelib chiqib hisoblanadi?

— Hozirda ikkinchi toifa, birinchi toifa va oliy toifaning oyliklari ma’lum. Ana shu o‘zlari uchun belgilangan oylik maoshlariga nisbatan yetmish foiz ustama qo‘llanadi. Lekin bu degani, 62 ball olgan ustoz ikkinchi toifaga o‘ta olmaydi degani emas.

Masalan, men mutaxassis o‘qituvchi bo‘lsam, attestatsiyada qatnashib 62 ball oladigan bo‘lsam, ikkinchi toifani olaveraman. O‘sha yerda ko‘rsatilgan lavozim maoshimga ega bo‘laman. Agar men mutaxassis sifatida attestatsiyada qatnashsam, deylik to‘qson ball olsam, men ham ikkinchi toifaga, ham ikkinchi toifadagi oylik maoshimga va unga qo‘shilgan yetmish foiz ustamaga ega bo‘laman.  

— Demak, bir vaqtning o‘zida ikki marta imkoniyat bo‘ladimi shunda?

— Ya’ni kimning kuchi yetsa, shunchaki ikkinchi toifaga o‘tadi, kim yanada kuchliroq bo‘lsa, o‘sha yetmish foiz bilan ikkinchi toifaga o‘tadi. Ya’ni toifasidan qat’i nazar, hammaga, 86 balldan yuqori olganlarga 70 foizlik ustama qo‘llanishi nazarda tutilmoqda.

— U holda faqat o‘sha 70 foizlik ustama uchun alohida test topshirish shart bo‘lmaydimi?

— Ha shunday. Faqat o‘qituvchi buning uchun attestatsiya test sinovida qatnashishi kerak. Attestatsiyadan ozod qilinganlar, marhamat, navbatdan tashqari attestatsiyaga kelishi mumkin. Shuningdek, xalqaro yoki milliy sertifikatga ega bo‘lgan pedagoglar ham 70 foizlik ustamani olish uchun navbatdan tashqari attestatsiyada qatnashishlari kerak bo‘ladi.

Imkoniyatlarning barchasi ustozlarimiz uchun. Ya’ni, o‘qituvchilarning maoshini oshirish masalasida, lekin faqat bilimlilariga va o‘z ustida ishlayotganlariga. Men bahorgi attestatsiyadan beri o‘qituvchilarni kuzatib kelaman, ular tinimsiz o‘z ustlarida ishlashdi. Yangi asr ko‘nikmalariga ega bo‘lish uchun, bilimlarini oshirishdi, kerak bo‘lsa, hatto ko‘pchiligi pulli kurslarga qatnashdi.

Bizning maqsadimiz shu emasmidi, o‘qituvchini bilimli qilish emasmidi? Ya’ni, maqsadga erishyapmiz demoqchiman.Kim o‘zini ustida ishlamasa, afsuski, nizomga ko‘ra u bilan xayrlashishimizga to‘g‘ri keladi, kim o‘z ustida ishlasa, nafaqat toifasini oshirib olishi, balki keyingi o‘quv yildan boshlab xalqaro akkreditatsiyadan o‘tadigan bo‘lsak, o‘qituvchilar 70% ustamaga ham ega bo‘lishi mumkin bo‘ladi.

Vazirlik mas’ul xodimi Sardor Raximboyevning fikrlaridan kelib chiqib aytadigan bo‘lsak, kelgusida attestatsiya test sinovlarida 86 ballik natijani qayd etgan barcha pedagoglarga 70 foizlik ustama to‘lab beriladi. Bunda pedagoglarning qaysi malaka toifasi uchun attestatsiya test sinoviga jalb qilinganligi ahamiyatga ega bo‘lmaydi.

Ya’ni, ikkinchi, birinchi yoki oliy toifa olish uchun test sinovlarida qatnashgan barcha o‘qituvchilar 86 balldan yuqori natijani qayd etadigan bo‘lsa, malaka toifasiga qo‘shimcha ravishda 70 foizlik ustamaga ega bo‘lishi mumkin bo‘ladi.