Qayta tayyorlovdan o‘tgan o‘qituvchi mutaxassis o‘qituvchidan ko‘proq dars olishi mumkinmi?

Savol

Bizda shunday muammo bo‘layapti: Qayta tayyorlovdan o‘tgan o‘qituvchi 1-toifali, shu mutaxassislik bo‘yicha bitirgan o‘qituvchining esa toifasi yo‘q, ustuvorlik kimda? “3271”da qayta tayyorlovdan o‘tgan o‘qituvchi mutaxassis toifasidan keyin turibdi. Shunga oydinlik kiritib bering.

Javob

Ma’lumki, “Umumta’lim muassasalarida sinflarni komplektlash hamda tarifikatsiya ro‘yxatlarini shakllantirish tartibi to‘g‘risida”gi nizomning (ro‘yxat raqami: 3271) 15-bandida o‘qituvchilarga dars soatlarini taqsimlashda hisobga olinadigan ko‘rsatkichlarning ustuvor ketma-ketligi keltirilgan.

Ushbu bandda jami 19 ta ko‘rsatgich belgilangan bo‘lib, ularning 8-, 9- va 11-ko‘rsatgichlarda oliy, birinchi va ikkinchi toifaga ega bo‘lgan o‘qituvchilarga ustuvorlik berilgan.

Quyiroqda, ya’ni 15-ko‘rsatgichda esa qayta tayyorlash bo‘yicha diplomga ega o‘qituvchilar ko‘rsatib o‘tilgan.

Ya’ni, agar maktabda ma’lum bir fandan oliy, birinchi yoki ikkinchi toifaga ega bo‘lgan o‘qituvchi bo‘lsa va shuningdek, qayta tayyorlash bo‘yicha diplomga ega o‘qituvchi bo‘lsa, maksimal dars soatlari eng birinchi navbatda malaka toifasiga ega bo‘lgan o‘qituvchilarga beriladi.

Endi savol muallifi keltirib o‘tgan vaziyatga e’tibor qaratamiz

Savol muallifi nazarda tutgan holat biroz boshqacharoq vaziyat. Bunda qayta tayyorlash bo‘yicha diplomga ega o‘qituvchining toifasi mavjud bo‘lib, fan yo‘nalishi bo‘yicha oliygohni tamomlagan mutaxassis o‘qituvchida malaka toifasi mavjud emas.

Bunday holatda dars soatlarini taqsimlashda malaka toifasiga ega bo‘lgan, qayta tayyorlash bo‘yicha diplomga ega o‘qituvchiga ustuvorlik beriladi.

Chunki, qayta tayyorlov o‘qituvchiga ma’lum bir fanlardan dars o‘tish huquqini beradi. Dars o‘tish huquqini olgan o‘qituvchi aynan shu fan bo‘yicha malaka toifasiga ega bo‘lib olsa, dars soatlari taqsimotida ustuvorlikni qo‘lga kiritishi mumkin.

Ya’ni, qayta tayyorlash bo‘yicha diplomga ega o‘qituvchining ma’lum bir fan yo‘nalishi bo‘yicha oliygohni tamomlagan mutaxassis o‘qituvchi bilan teng huquqiga ega.

Ularning maksimal miqdorda dars olish huquqi  “Umumta’lim muassasalarida sinflarni komplektlash hamda tarifikatsiya ro‘yxatlarini shakllantirish tartibi to‘g‘risida”gi nizomning 15-bandida ko‘rsatilgan ustuvor ko‘rsatgichlardan birini qo‘lga kiritgan vaqtdan boshlab paydo bo‘ladi.