CHQBT shtat birligi Mudofaa vazirligiga o‘tkaziladi

Prezident Shavkat Mirziyoyev maktablarda musiqa, jismoniy tarbiya va harbiy vatanparvarlik fanlari sifatini oshirish bo‘yicha taqdimot bilan tanishdi.

Unda hozirgi kunda maktablarda qariyb 10 ming nafar chaqiriqqacha boshlang‘ich tayyorgarlik fani o‘qituvchilar faoliyat ko‘rsatayotganligi, lekin ularning 27 foizi nomutaxassis, 2 ming 750 ta maktabda ushbu fan uchun sharoit yetarli emasligi ta’kidlandi.

Shu bois endi chaqiriqqacha boshlang‘ich tayyorgarlik o‘qituvchisi shtati Mudofaa vazirligiga o‘tadi. Endi bu vazifaga Qurolli Kuchlar zaxirasidagi harbiylar ishga qabul qilinadi.

Mazkur fan bo‘yicha yangi o‘quv dasturi va darsliklar yaratiladi. Har bir tuman va shaharda bittadan maktab negizida “Jasorat maktabi” faoliyati yo‘lga qo‘yiladi.