Kasb kasalligiga chalingan o‘qituvchiga 70 mln so‘m tovon puli undirib beriladigan bo'ldi

20 yil bir maktabda ishlab, kasb kasalligiga chalingan o‘qituvchiga 70 million so‘m zarar pullari va tovon pullari undirib beriladigan bo‘ldi. Bu haqda “Zamon” informatsion dasturida xabar berildi.

Sirdaryolik o‘qituvchi uzoq yillar maktabda ishlab, kasb kasalligiga chalingani ma’lum bo‘ldi. U nafaqa pulini undirish uchun sudga murojaat qildi, chunki tuman maktabgacha va maktab ta’limi bo‘limi kasb kasalligi tufayli nafaqaga chiqqan pedagogning pullarini o‘z vaqtida to‘lab bermadi.

Pedagog xodimning manfaatida sudga da’vo kiritgan O‘zbekiston kasaba uyushmalari federatsiyasi Sirdaryo viloyat kengashi esa suddan tuman maktabgacha va maktab ta’limi bo‘limidan o‘qituvchining foydasiga nafaqa pullarni undirishni so‘ragan.

Qariyb 20 yil bir maktabda o‘quvchilarga saboq bergan o‘qituvchi yillar o‘tgan sayin sog‘lig‘ida muammolar bo‘layotganligini aytib, shifokorlarga murojaat qiladi. Afsuski, tibbiy ko‘rik natijalariga ko‘ra shifokorlar unga kasb kasalligiga uchragani va mehnat faoliyatini darhol to‘xtatish zarurligini maslahat berishdi.

O‘qituvchi shunday ham qildi, lekin unga tuman maktabgacha va maktab bo‘limi nafaqa pullarini to‘lamay keldi. Shundan so‘ng, ishni sudga oshirishga to‘g‘ri keldi. O‘qituvchining murojaatiga asos bo‘lgan masala fuqarolik ishlari bo‘yicha Sirdaryo tumanlararo sudida ko‘rib chiqildi.

Ishni ko‘rish davomida shunisi aniq bo‘ldiki, da’vogar ko‘p yillar davomida o‘qituvchi lavozimida ishlab kelganligi natijasida kasb kasalligiga uchragan, ya’ni unga surunkali laringit tashxisi qo‘yilgan. Javobgar tashkilotga ham haqiqatan kasaba uyushmasi tomonidan taqdimnoma kiritilgan, tegishli ko‘rsatma xatlar kelib tushgan, lekin ijrosi ta’minlanmagan.

Javobgar taraf esa da’vo arizasidagi summalar fuqaroga to‘lab berilishi lozimligi to‘g‘risida tuman moliya bo‘limiga xat bilan murojaat qilganligini, tashkilot budjet tashkiloti bo‘lganligi sababli keyingi yil xarajatlar smetasiga kiritilgach, ushbu pullar to‘lab berilishini sudga ma’lum qildi.

“Mehnat kodeksida bu qoida aniq belgilab qo‘yilgan. Agar kasb kasalligi yoki mehnat faoliyati natijasida fuqaro zarar ko‘radigan bo‘lsa, unga sog‘lig‘iga zarar yetadigan bo‘lsa, bu to‘lov albatta to‘lab berilishi shart. 

Shu bois, shu qonunchilikdan kelib chiqib, da’vogarning da’vosini to‘liq qanoatlantirish haqida qaror qabul qilindi”, deydi fuqarolik ishlari bo‘yicha Sirdaryo tumanlararo sudi raisi Jo‘rabek Xudoynazarov.

Nihoyat, sud yakuniga ko‘ra, o‘qituvchining manfaati qondirilib, 70 million zarar pullari va tovon pullari undirib beriladigan bo‘ldi. Demak, o‘z haq-huquqini yaxshi bilgan o‘qituvchi endilikda unga to‘lanishi lozim bo‘lgan nafaqa pullarini hech qanday muammolarsiz olishi mumkin.