Endilikda psixologlar ham malaka toifasi olishi mumkin

Ma’lumki, Vazirlar Mahkamasining 2019-yil 12-iyuldagi 577-son qarori bilan tasdiqlangan “Umumiy o‘rta va o‘rta maxsus davlat ta’lim muassasasidagi psixologik xizmatning psixolog kadrlarini attestatsiyadan o‘tkazish tartibi to‘g‘risida”gi nizomda psixologlarni attestatsiyadan o‘tkazish tartibi belgilangan.

Ammo hozirga qadar ta’lim muassasalarida faoliyat yurituvchi psixologlarning kasb standarti mavjud bo‘lmaganligi sababli ular attestatsiyaga jalb qilinmagandi.

Kuni kecha, Maktabgacha va maktab ta’limi vazirligi tomonidan e’lon qilingan pedagoglarni attestatsiyadan o‘tkazishga doir materiallar ro‘yxatida maktab psixologlarini ham ko‘rish mumkin.

Unda psixologiya fanidan pedagog kadrlarning malaka toifalari  test tizimi uchun test spetsifikatsiyasi ham joy olgan.

Bundan shuni tushunish mumkinki, joriy yilgi bahorgi attestatsiyadan boshlab maktab psixologlari malaka test sinovlarida ishtirok etib, toifa olishlari mumkin.

Eslatib o‘tamiz, hozirgi kunda psixologlarning oylik maoshi ham malaka toifasiga ko‘ra farqlanib, quyidagicha belgilangan:

• Oliy ma’lumotli psixolog – 3 mln 051 ming 742 so‘m;

• Ikkinchi toifali psixolog – 3 mln 268 ming 047 so‘m;

• Birinchi toifali psixolog – 3 mln 489 ming 865 so‘m;

• Oliy toifali psixolog – 3 mln 702 ming 280 so‘m.
  
  

Psixologlar uchun test spetsifikatsiyasi bilan tanishing