10-sinf o‘quvchilariga o‘qishini texnikumlarga ko‘chirishga ruxsat beriladi

2025-yil 23-oktabr kuni O‘zbekiston Respublikasi Prezidentining ‘‘Kasbiy ta’lim tizimida islohotlarni amalga oshirish chora-tadbirlari to‘g‘risidagi’’ qarori imzolandi.

Qaror bilan maktabning 10-sinf o‘quvchilariga o‘qishini texnikumlarga ko‘chirishga ruxsat berildi. Shuningdek, kasbiy ta’lim tizimini 2030-yilga qadar isloh qilishning asosiy maqsadli ko‘rsatkichlari ham belgilandi.

2026/2027 o‘quv yilidan boshlab yoshlarni kasb-hunarga yo‘naltirishning quyidagi tartibi joriy etiladi:

• “Atrofimizdagi kasblar” dasturi asosida maktabgacha ta’lim tashkilotlarida 5 yoshdan boshlab bolalarda o‘yinlar orqali turli kasblar haqida ilk tasavvurlar shakllantiriladi;

• “Kasblar alifbosi” dasturi asosida umumiy o‘rta ta’lim tashkilotlarining 1 — 4-sinf o‘quvchilariga turli kasblar ahamiyati haqida tushunchalar beriladi va ularning dastlabki kasbiy qiziqishlari rivojlantiriladi;

• “Kasblar olami” dasturi asosida 5-6-sinf o‘quvchilarining kasbiy faoliyat va mehnat sohalariga qiziqishlari rivojlantiriladi va kelajakdagi kasbiy tanlovga tayyorgarlikning asosi yaratiladi;

• “Mening kelajakdagi kasbim” dasturi asosida maktab maslahatchilari tomonidan 7 — 9-sinf o‘quvchilarining kasbiy qiziqishlari, qobiliyatlari va iqtidorlari aniqlanib, ularni akademik ta’lim yoki kasb-hunarga yo‘naltirish ishlari tashkil etiladi;

• o‘quvchilarga videoroliklar namoyishi, korxonalarga ekskursiyaga olib borish va kasb egalari bilan uchrashuvlar tashkil etish orqali kasblar haqida to‘liqroq ma’lumotlar beriladi;

• maktab psixologlari bilan birgalikda 7-sinfdan boshlab o‘quvchilarning qiziqishlari, qobiliyatlari, shaxsiy xususiyatlari va temperamenti asosida kasbga qiziqishi aniqlanadi;

• o‘quvchilarning kasbga qiziqishiga oid ma’lumotlar asosida har bir o‘quvchi uchun shaxsiy kasbga yo‘naltirish tavsiyasi ishlab chiqiladi hamda bu masala o‘quvchilarning ota-onasi bilan muhokama qilinadi;

• 2028-yildan boshlab texnikumga yo‘naltirish 9-sinf yakuni bo‘yicha o‘tkaziladigan imtihon natijasiga ko‘ra amalga oshiriladi.