Rahbar xodimlar darsi uchun soatbay haq to‘lanishi to‘g‘rimi?

Savol

Men maktabda 0,5 stavka “zavuch” lavozimida ishlab kelmoqdaman. Shu bilan birga 10 soat dars ham olganman. Dekabr oyigacha dars o‘tganligim uchun xuddi o‘qituvchilar singari ish haqi to‘liq berilar edi, ya’ni tarifikatsiya qilingan edi. 

Endi bizga soatbay ravishda haq to‘lanadigan bo‘ldi. Savolim shuki, rahbar xodimlarga o‘zi cheklangan miqdorda dars berilsa, shu dars soati uchun pulni ham soatbay qilib to‘lanishi to‘g‘rimi?

Javob

Vazirlar Mahkamasining 2005-yil 21-dekabrdagi 275-son qarori bilan tasdiqlangan “Xalq ta’limi xodimlari mehnatiga haq to‘lash to‘g‘risida”dagi nizomning 14-bandiga ko‘ra ta’lim muassasasining rahbar xodimi tomonidan uning egallab turgan shtat birligidan qat’i nazar, asosiy lavozimning bir haftada 10 soatgacha hajmda o‘qituvchi lavozimi bilan qo‘shib olib borilishiga (o‘quv yuklamasi yuritilishiga) yo‘l qo‘yiladi.

Bunda rahbar xodimlar tomonidan o‘tilgan o‘quv soatlari uchun soatbay ravishda haq to‘lanishi belgilangan.

Soatbay asosida haq to‘lash ish haqi miqdorining kamayishiga olib kelmaydi

O‘zbekiston Respublikasi Oliy va o‘rta maxsus ta’lim vazirligi, Xalq ta’limi vazirligi, Bandlik va mehnat munosabatlari vazirligining 2019-yil 10-apreldagi 3-2019, 19-qq va 15-2019-qq-son qaroriga ilovada “O‘quv mashg‘ulotlarini o‘tkazganlik uchun mehnatga soatbay haq to‘lash miqdorlari” belgilangan.

Unga ko‘ra mehnatga soatbay haq to‘lash miqdori bazaviy lavozim maoshlariga nisbatan 1,20 foiz miqdorda hisoblanib, uning miqdori tarkibiga mehnat ta’tili haqi kiritiladi.

Bunda soatbay asosda dars o‘tayotgan rahbar xodim faqat o‘quv yuklamani o‘zini bajaradi. Sodda qilib aytganda, rahbar xodimlar faqatgina dars o‘tadi xolos, pedagogik yuklamani bajarmaydilar.

Yuqoridagilardan xulosa qilib shuni aytishimiz mumkinki, umuman olganda, rahbar xodimlar o‘tgan dars soatlari uchun soatbay asosida haq to‘langan taqdirda ham, ular moddiy tomonlama hech narsa yutqazmaydilar.