14-yanvar kuni o‘qishmi yoki dam olish kunimi?

Savol 

14-yanvar Vatan himoyachilari kuni munosabati bilan dam olish kuni deb e’lon qilinganmi? Bu kuni ham dam olish kuni bo‘ladigan bo‘lsa, mavzularni jurnalga qanday tartibda yozamiz? Yoki tig‘izlashtirgan holda boshqa kunga ko‘chiramizmi?

Javob 

1992-yilning 14-yanvar sanasida O‘zbekiston Respublikasi Qurolli Kuchlari tashkil topgan. 1993-yilning 29-dekabr kuni esa O‘zbekiston Respublikasi Oliy Kengashining qarori bilan “14-yanvar – Vatan himoyachilari kuni” deb belgilangan.

Ya’ni, 14-yanvar haqiqatdan ham bayram sanasi hisoblanadi, lekin bu sana ishlanmaydigan bayram kunlari tarkibiga kirmaydi. Shu sababli, barcha muassasa va tashkilotlar uchun 14-yanvar ham rasman ish kuni hisoblanadi. 

Mehnat kodeksining 208-moddasiga ko‘ra quyidagi sanalar ishlanmaydigan bayram kunlaridir:

• 1-yanvar — Yangi yil;

• 8-mart — Xotin-qizlar kuni;

• 21-mart — Navro‘z bayrami;

• 9-may — Xotira va qadrlash kuni;

• 1-sentyabr — Mustaqillik kuni;

• 1-oktyabr — O‘qituvchi va murabbiylar kuni;

• 8-dekabr — O‘zbekiston Respublikasi Konstitutsiyasi kuni;

• Ro‘za hayit (Iyd al-Fitr) diniy bayramining birinchi kuni;

• Qurbon hayit (Iyd al-Adha) diniy bayramining birinchi kuni.

Xulosa qilib aytadigan bo‘lsak, maktab o‘quvchilari uchun 2025-yil 28-dekabrdan boshlangan qishki ta’til 2026-yil 10-yanvardan  yakunlanadi. 2026-yil 12-yanvardan esa dars jarayonlari boshlanadi. 

Bunda 14-yanvar kuni ham odatdagidek dars jarayonlari bo‘ladi. Shu sababli elektron (qog‘oz) jurnalga ham o‘zgartirishlar kiritish talab etilmaydi.