MMTB mas’ullari 1 mlrd so‘mlik budjet mablag‘larini talon-toroj qilgani aniqlandi

Namangan viloyatining Davlatobod tumanida ta’lim muassasalarini isitish tizimi uchun ajratilgan budjet mablag‘lari bilan bog‘liq moliyaviy qonunbuzarlik fosh etildi.

Bosh prokuratura huzuridagi Departamentning Namangan viloyati boshqarmasi tomonidan o‘tkazilgan tergovga qadar tekshiruvda Davlatobod tumani Maktabgacha va maktab ta’limi bo‘limining mas’ul shaxslari va boshqa fuqarolar o‘zaro til biriktirgan holda 1 mlrd so‘m miqdoridagi budjet mablag‘larini o‘zlashtirgani aniqlandi.

Ma’lum bo‘lishicha, tumandagi ta’lim muassasalariga isitish qozonlarini yetkazib berish bo‘yicha tegishli shartnoma tuzilgan. Shartnoma shartlariga muvofiq, ta’lim muassasalari uchun “ABS” rusumli isitish qozonlari sotib olinishi lozim bo‘lgan. Biroq, amalda shartnomada ko‘rsatilgan mahsulot o‘rniga “LES” rusumli isitish qozonlari xarid qilingan.

Natijada, dastlabki hisob-kitoblarga ko‘ra, 1 mlrd so‘m miqdoridagi budjet mablag‘lari o‘zlashtirish yoki rastrata yo‘li bilan talon-toroj qilingan. Mazkur holat yuzasidan Jinoyat kodeksining 167-moddasi — o‘zlashtirish yoki rastrata yo‘li bilan talon-toroj qilish moddasi bilan jinoyat ishi qo‘zg‘atilgan. Hozirda jinoyat ishi doirasida tergov harakatlari olib borilmoqda.