Noqonuniy ishdan bo‘shatilgan direktor qayta ishga tiklandi, xodim foydasiga 20 mln so‘m undirildi

Farg‘ona viloyati Quva tumanidagi 14-davlat maktabgacha ta’lim tashkilotida 20 yildan buyon ishlab kelayotgan Shahzodaxon Jalilova Farg‘ona viloyati maktabgacha va maktab ta’limi boshqarmasi boshlig‘ining buyrug‘i bilan ishdan olinadi.

Xodim bilan tuzilgan mehnat shartnomasi kutilmaganda Farg‘ona viloyati maktabgacha va maktab ta’limi boshqarmasining buyrug‘i bilan Mehnat kodeksining 157-moddasiga binoan, ya’ni taraflarning kelishuviga ko‘ra, bekor qilib yuboriladi.

O‘z-o‘zidan savol tug‘iladi, haqiqatan ham ish beruvchi va xodim o‘rtasida tegishli ravishda kelishuv bo‘lgan edimi?

O‘zbekiston kasaba uyushmalari Federatsiyasining Farg‘ona viloyati kengashi mutaxassislari tomonidan Sh.Jalilovaning avvalgi lavozimiga ishga tiklashga amaliy yordam so‘rab qilgan murojaati sinchkovlik bilan o‘rganib chiqildi.

O‘rganish davomida bog‘cha mudirasi ishdan bo‘shash to‘g‘risidagi arizani o‘z xohishiga ko‘ra yozmagani ma’lum bo‘ldi.

Ish sudda ko‘rib chiqildi. Unga ko‘ra Sh.Jalilova 14-davlat maktabgacha ta’lim tashkiloti direktori lavozimiga ishga tiklandi. Majburiy progul kunlari va ma’naviy zarar uchun uning foydasiga salkam 20 million so‘m undirib berildi.