Malaka toifasi uchun pul to'lab, arizasi rad qilinganlarga oxirgi imkoniyat berilmoqda

Xabaringiz bor, pedagoglar attestatsiyasida ishtirok etish uchun to‘lovni amalga oshirish muddati joriy yilning 10-oktyabriga qadar uzaytirilgandi.

Ammo ayrim sabablarga ko‘ra kechroq ariza topshirgan pedagoglarning hujjatlarini tahrirlash imkoniyati mavjud emasdi. Chunki hujjatlarni qabul qilish 1-oktyabrdayoq to‘xtatilgandi.

Mazkur holatga aniqlik kiritish maqsadida xalqtaliminfo.uz Maktabgacha va maktab ta’limi vazirligi Pedagog kadrlarga malaka toifalarini berish jarayonini tashkil etish boshqarmasi boshlig‘i Sardor Rahimboyev bilan bog‘langandi.

O‘shanda Sardor Rahimboyev to‘lovlarni amalga oshirgan, ammo hujjatlarni tahrirlashga ulgurmagan pedagoglarga qo‘shimcha muddat belgilash bo‘yicha taklif kiritilgani haqida ma’lum qilgandi.

Bugun Maktabgacha va maktab ta’limi vazirligi mas’ul xodimi Sardor Rahimboyevning xalqtaliminfo.uz'ga ma’lum qilishicha, rad qilingan murojaatlarni tahrirlab qayta yuborishga oxirgi marotaba ruxsat beriladi.

“Arizalarni qayta tahrirlash imkoniyati bugun ochib qo‘yiladi. Ayni vaqtda rad qilingan murojaatlarni tahrirlab qayta yuborishga ruxsat berilishi kutilmoqda”, - deya ta’kidladi Sardor Rahimboyev.

Bu pedagoglar uchun oxirgi imkoniyat bo‘lib, shu sababli pedagoglar o‘zi to‘g‘risidagi ma’lumotlarga befarq bo‘lmasligi lozim. Chunki, yana xato ma’lumotlar kiritilsa, tahrirlash uchun boshqa imkoniyat berilmaydi.